සලමොන්ගේ ප්‍රඥාව

– 1 වන පරිච්ඡේදය –

දෙවිඳුන් සොයා යාම

1 මිහි පිට විනිසකරුවෙනි, දැහැමිකමට ප්‍රේම කරන්න. 
සමිඳුන් ගැන ඔබේ කල්පනා අවංකකමින් ප්‍රබෝධ වේ වා! 
අවංක සිතකින් එතුමන් සොයා යන්න. 
2 එතුමන් පරීක්ෂා නොකරන අයට එතුමන් හමු වන බැවින් එතුමන් කෙරෙහි විශ්වාසය තබන අයට එතුමාණෝ එළිදරව් වන සේක. 
3 එහෙත් ආත්මාර්ථකාමී අදහස් නිසා කෙනෙක් දෙවිඳුන්ගෙන් වෙන් වෙති. 
යමෙක් සව් බලැති තැනැන් වහන්සේ පරීක්ෂා කරන විට එතුමාණෝ ඒ අනුවණයන් වියවුල් කරන සේක.
4 ප්‍රඥාව කපටියෙකු තුළට කිසිදාක ඇතුළු නොවේ. 
පවට ණය ගැති වූවෙකු තුළ ද එය නොනවති යි. 
5 උපදෙස් දෙන ශුද්ධාත්මය රැවටීම් හෙළා දකිනු ඇත. 
සාහසික අරමුණුවලින් එය ඈත් ව සිටියි. 
දුෂ්ටකම මතුවන විට එය විස්මිත වෙයි.

ප්‍රඥාවේ අගය

6 ප්‍රඥාව මිනිසාට මිත්‍රශීලි ආධ්‍යාත්මික වස්තුවකි. 
එහෙත් එය දේවාපහාසකරුවන්ගේ වචනවලට නිසි ප්‍රතිවිපාක දෙයි. 
මන්ද, දෙවිඳුන් යමෙකුගේ ඇතුළාන්තයට සාක්ෂි දරමින් දැක ඔහුගේ හද සැබැවින් ම පරීක්ෂා කර බලා ඔහුගේ කතාවට සවන් දෙන බැවිනි. 
7 සැබැවින් ම සමිඳුන්ගේ ආත්මයාණන් මුළු ලොව පූර්ණ කරනු ඇත. 
මුළු ලොව සියල්ල ඒකාබද්ධ කරන එතුමාණෝ කියන ලද හැම වචනයක් ම දන්නා සේක. 
8 අසාධාරණ වචන තෙපලන තැනැත්තා කිසිදාක අසු නොවී නොයනු ඇත. 
වරදට දඬුවම් දෙන දැහැමියාණන් ඔහු අත්හැර නොයනු ඇත. 
9 අභක්තිවන්ත මිනිසාගේ සිතුම්පැතුම් සොයා බලනු ලැබේ. 
ඔහුගේ අපරාධවලට දඬුවම් දෙන පිණිස ඔහු කී දේ ගැන වාර්තාවක් සමිඳුන්ට ලැබෙනු ඇත.
10 සියල්ල ඇසෙන ඊර්ෂ්‍යාකාර කනක් ඇත. 
පැමිණිල්ලක් ගැන කෙඳිරීම පවා එයට ඇසේ. 
11 එබැවින් නිකරුණේ පැමිණිලි කිරීමෙන් වළකින්න. 
වරද සෙවීම සඳහා කතාවට නොයන්න. 
ඉතා රහසිගත වචනයකින් පවා දෝංකාරයක් ඇති වේ. 
මුසා කීමෙන් කෙනෙකු මරාදැමිය හැකි ය.

දැහැමි දිවිය අමරණීය ය

12 වැරදි මඟ යාමෙන් මරණයට පත් නොවන්න. 
ඔබේ ම ක්‍රියාවලින් විනාශය ළඟා කර නොගන්න. 
13 මරණය දෙවිඳුන්ගේ ක්‍රියාවක් නොවේ. 
ජීවමාන අය වනසාලීමෙන් එතුමාණෝ ප්‍රීති නොවන සේක. 
14 එතුමාණන් සියල්ලක් මැව්වේ ජීවත් වන පිණිස ය. 
මිහි පිට මැවිලි සියල්ල යහපත් ය. 
ඒවා තුළ මාරක විෂ ගතියක් නැත. 
15 මරණයට මිහිතලය කෙරෙහි බලයක් නැත. 
දැහැමිකම අමරණීය ය.

අභක්තිකයාගේ ජීවිතය

16 අභක්තිකයෝ තම ක්‍රියාවෙන් සහ වචනයෙන් මරණයට අයැදුම් කරති. 
මරණය මිතුරෙකු මෙන් සලකාගෙන එය සඳහා වෙහෙසෙති. 
මරණය සමඟ ගිවිසුමක් කොට ඔව්හු මරණයේ පංගුකාරයන් වීමට සුදුස්සෝ වෙති.
අනුවණ ලෙස සිතාමතා ඔව්හු මෙසේ කියති;

– 2 වන පරිච්ඡේදය –

1 ”අපේ ජීවිතය ලුහුඬු ය; 
දුකින් පිරී ඇත. 
මිනිසාගේ අන්තිමය ළඟා වන විට ඔහුට කිසි සහනයක් නැත. 
පාතාල ලෝකයෙන් මිදීම දීමට දන්නා කිසිවෙක් නැත. 
2 අහම්බෙන් අපි උපත ලැබීමු. 
මේ ජීවිතයෙන් පසු අප කවදාවත් නොසිටියාක් මෙන් වනු ඇත.
අපේ නාස් පුඩුවල හුස්ම දුම්රොදක් පමණි. 
අපේ ඥානය හදවතේ ස්පන්දනයෙන් නඟින ගිනි පුපුරක් පමණි.
3 මෙය නසාදැමූ විට අප ශරීරය අළුවලට හැරේ. 
ජීවන හුස්ම නිසල සුළඟ මෙන් පහ වී යනු ඇත. 
4 කලක් යන විට අපේ නම අමතක වනු ඇත. 
අප කළ දේ කිසිවෙකුට මතක නැතිවනු ඇත. 
අපේ ජීවිතය වලාකුළු රොදක් මෙන් ගසාගෙන යනු ඇත. 
ඉරු එළියෙන් පහ වී යන ඉරු රශ්මියෙන් වැනසී යන මීදුම මෙන් එය දිය වී යනු ඇත. 
5 එසේ ය, අපේ ජීවිත කාලය සෙවණැල්ලක් මෙන් පහ වී යනු ඇත. 
මරණින් පසු ආපසු හැරී ඒමක් නැත. 
අපේ ඉරණම වෙනස් කළ නොහැකි ය.

අභක්තිකයන්ගේ අනුවණකම

6 එබැවින් එන්න, තිබෙන හොඳ හොඳ දෙයින් ප්‍රීති වෙමු. 
උද්‍යෝගයෙන් විනො‍්දකාමී තරුණයන් මෙන් අපි මේ ලොව භුක්ති විඳිමු. 
7 ඉස්තරම් මිදිරසයෙන් ද සුවඳ විලවුන්වලින් ද තෘප්තිමත් වෙමු. 
වසන්තයේ එක මලක් වත් අමතක නොකර 
8 ඒවා මලානික වීමට පෙර රො‍්සමලින් අපි ඔටුනු සාදාගනිමු. 
9 අපගේ මධු පානො‍්ත්සවයට සියල්ලෝ සහභාගි වෙත් වා! 
සැම තැන ම අපේ ප්‍රීති විනො‍්දයේ ලකුණු තබා යමු. 
අපගේ කොටස මෙය වේ. 
අපට පවරන ලද උරුමය මෙය වේ.

දුප්පතාට දෙන දුක

10 දිළිඳු දැහැමි කෙනෙක් සිටිත් ද, අපි ඔහුට පීඩා කරමු. 
ඔහුගේ වැන්දඹුවට අනුකම්පා නොකරමු. 
ගරු නොකරමු. මහලු වියට හො‍් දිගායු ලැබූ පැසුණු හිසට හො‍් ගරු නොකරමු. 
11 දුබලකම නිෂ්ඵල බැවින් අපේ ශක්තිය දැහැමිකම මනින මිම්ම වේ වා! 
12 දැහැමියා අපට කරදර කරන බැවින් ද, අපේ ජීවිත ක්‍රමයට විරුද්ධ වන බැවින් ද, නීතිය කඩ කරන විට අපට දොස් පවරන බැවින් ද, අප ප්‍රගුණ කළ විනයට එරෙහි ව චෝදනා කරන බැවින් ද, අපි ඔහු එන තෙක් සැඟවී බලා සිටිමු. 
13 දැහැමියා තමාට දෙවිඳුන් ගැන දැනීම ඇතැ යි පිළිගනී. 
ඔහු සමිඳුන්ගේ පුත්‍රයා යයි ද කියාගනියි. 
14 ඔහු අපේ සිතුම්පැතුම්වලට එරෙහි ව සිටියි. 
එය අපේ සිතුම්පැතුම්වලට එරෙහි ව යන චෝදනාවකි. 
එවැන්නකුගේ මුහුණ දැකීම පවා අප සිතට වේදනාවකි. 
15 ඔහුගේ ජීවිත මාර්ගය අන් අයගේ මෙන් නොවේ. 
ඔහු යන මඟ අපට නුපුරුදු ය. 
16 ඔහුගේ මතය අනුව අපි හොර කාසි වැනි ය. 
කසළ ගොඩකින් ඈත් වන්නා සේ අප කරන දෙයින් ඔහු ඈත් වෙයි. 
දැහැමියාගේ අන්තිමය භාග්‍යවත් ය කියා ඔහු පවසයි. 
දෙවිඳුන් තම පියා යයි ඔහු පාරට්ටු කරගනියි. 
17 ඔහු පවසන දේ ඇත්ත ද කියා බලමු. 
ඔහුට ලැබෙන අන්තිමය කුමන එකක් ද කියා සෝදිසි කරමු. 
18 දැහැමියා දෙවිඳුන්ගේ පුත්‍රයා නම් දෙවිඳුන් ඔහුට පිහිට වී සතුරාගේ ග්‍රහණයෙන් ඔහු මුදනු ඇත.
19 ඔහුට කෲර ලෙස වද දී ඔහු පරීක්ෂා කරමු. 
මෙලෙස ඔහුගේ කුළුණු ගුණය සොයා බලමු. 
ඔහුගේ ඉවසීම පරීක්ෂා කර බලමු. 
20 ඔහුට ගැළවීම ලැබේ යයි ඔහු කියා සිටින බැවින් ලජ්ජා සහිත මරණයකට ඔහු හෙළාදමමු.

අභක්තිකයන්ගේ වැරදි මත

21 අභක්තිකයන් කල්පනා කරන පිළිවෙළ මෙසේ ය. 
එහෙත් ඔව්හු නොමඟ යන්නො‍් ය. 
ඔවුන්ගේ දුෂ්ටකම නිසා ඔව්හු අඳුරේ සිටිති. 
22 දෙවිඳුන්ගේ රහස් අරමුණු ඔව්හු නොදකිති. 
ශුද්ධවන්තකමට ලැබෙන විපාකය පිළිබඳ බලාපොරොත්තුවක් ඔවුන්ට නැත.
නිදොස් අයට ලැබෙන විපාකය ගැන ඔව්හු නොදනිති. 
23 එහෙත්, දෙවිඳාණෝ මිනිසා නොමැරෙනසුලු කෙනෙකු කළ සේක. 
සිය ස්වරූපයට ඔහු මවා වදාළ සේක. 
24 ලොවට මරණය පැමිණියේ යක්ෂයාගේ ඊර්ෂ්‍යාවෙනි.
ඔහුගේ හවුල්කාරයන් ද මෙය සොයාගනු ඇත.

 

– 3 වන පරිච්ඡේදය –

සුදනාගේ ඉරණම

1 සුදනන්ගේ ජීවිත දෙවිඳුන්ගේ රැකවරණයෙහි ය. 
කිසි ම හිංසාවක් කිසිදාක ඔවුන්ට නොපැමිණෙනු ඇත. 
2 අනුවණයන්ගේ ඇස් ඉදිරියෙහි ඔව්හු මියයන්නාක් මෙන් වූ හ. 
ඔවුන්ගේ මරණය විපත්තියක් මෙන් පෙනුණි. 
3 ඔවුන් අප අත්හැර යාම නැත්තට ම නැති වීමක් මෙන් විය. 
එහෙත් ඔව්හු සාමදානයෙන් සිටිති. 
4 ඔවුන් දඬුවම් ලැබුවන් සේ මිනිසුන්ට පෙනුණ නමුත් ඔවුන්ගේ බලාපොරොත්තුව අමරණීය භාවයෙන් පෝෂණය විය. 
5 ඔවුන්ගේ වේදනාව අල්ප විය. 
ඔවුන් ලබන ආසිරි විශාල වනු ඇත. 
මන්ද, දෙවිඳුන් ඔවුන් පරීක්ෂා කළ විට තමන් සමඟ විසීමට ඔවුන් සුදුසු බව පෙනී ගියේ ය. 
6 එතුමාණෝ උදුනේ රත්රන් මෙන් ඔවුන් පරීක්ෂා කළ සේක. 
දවන යාග පූජාවක් මෙන් ඔවුන් පිළිගත් සේක. 
7 විනිශ්චය කාලය පැමිණෙන විට ඔව්හු බබළන්නො‍් ය; 
ඉපනැලි අතර ගිනි පුපුරු මෙන් දිළිසෙන්නො‍් ය. 
8 ඔව්හු ජාතීන් විනිශ්චය කරන්නො‍් ය; 
සෙනඟ පාලනය කරන්නො‍් ය. 
සමිඳාණෝ සදහට ම ඔවුන්ගේ රජ වන සේක. 
9 දෙවිඳුන් කෙරෙහි විශ්වාස කරන්නො‍් සත්‍යය තේරුම්ගන්නො‍් ය. 
සැදැහැවත්හු එතුමන් සමඟ ප්‍රේමයෙන් ජීවත් වන්නො‍් ය. 
එතුමන්ගේ තෝරාගත් අය හට වරප්‍රසාදය හා දයාව ඇත.

දුදනාගේ ඉරණම

10 එහෙත් අභක්තිකයන්ගේ කල්පනා නිසා ඔවුන්ට නිසි ලෙස දඬුවම් කරනු ඇත. 
මන්ද, ඔව්හු දැහැමියා නොසැලකූ හ. 
සමිඳාණන් අත්හැරදැමූ හ. 
11 එසේය, ප්‍රඥාවට හා විනයට දොස් තබන්නො‍් කාලකණ්ණි ය: 
ඔවුන්ගේ බලාපොරොත්තුව හිස් ය. 
ඔවුන්ගේ වෙහෙස මහන්සිය නිෂ්ඵල ය. 
ඔවුන්ගේ ක්‍රියාවලින් ලාභයක් නැත. 
12 ඔවුන්ගේ භාර්යාවෝ හිතුවක්කාර ය. 
ඔවුන්ගේ දරුවෝ දුරාචාරී ය. 
ඔවුන්ගේ පරපුර සාප ලද්දෝ ය.

අභක්තික දරුවෝ

13 වඳ ස්ත්‍රිය නිදොස් නම් ඈ භාග්‍යවන්තියකි. 
ඈ අනිසි ලෙස පුරුෂයෙකු සමඟ එක් වී නැත. 
ඇගේ සඵල බව විනිශ්චයේ දී දකිනු ඇත. 
14 අපරාධ නොකළ නපුංසකයා ද භාග්‍යවන්තයෙකි. 
ඔහු සමිඳුන්ට විරුද්ධ ව වරද නොසිතී ය. 
ඔහුගේ ලැදියාව නිසා ඔහුට විශේෂ වරමක් දෙනු ඇත. 
එය සමිඳුන්ගේ මාලිගාවෙහි මනහර කොටස වනු ඇත. 
15 අවංක ශ්‍රමයේ පල විපාක මහිමාන්විත ය. 
ප්‍රඥාවේ මුල් නොදිරයි. 
16 පරදාර සේවනය කරන්නන්ගේ දරුවන්ට අනාගතයක් නැත. 
අවජාත දරුවා අතුරුදහන් වේ. 
17 ඔවුන් දිගායු වැළඳුවත් ඔවුන්ගෙන් පලක් නැත. 
අවසානයේ දී ඔවුන්ගේ මහලු වියට ගරුසරු නොලැබේ. 
18 ඔවුන් වැඩි කල් යන්නට මත්තෙන් මැරුණත් ඔවුන්ට බලාපොරොත්තුවක් නැත. 
විනිශ්චය දිනයේ දී සැලකිල්ලක් ද නැත. 
එසේ ය, නපුර කරන අයගේ ඉරණම දරුණු ය.

 

– 4 වන පරිච්ඡේදය –

1 දරුවන් නොලැබුවත් දැහැමි ව පැවතීම හොඳ ය. 
මන්ද, දෙවිඳාණෝ ද මිනිසා ද එය ඉහළින් අගය කරති, දැහැමිකම සදහට ම අමරණීය ව පවතියි. 
2 දැහැමිකම ඇති විට අපි එය අනුගමනය කරමු. 
එය නැති විට එය ගැන පුල පුලා බලා සිටිමු. 
නිදොස් ව තෑගි ලබාගැනීමට එය යත්න දැරූ බැවින් ජය ලැබූ පසු එය කිරීටය ලබා සදහට ම ජයෙන් ජයට යනු ඇත. 
3 එහෙත් අභක්තික දරු කැලෙන් කිසි පලක් නැත. 
අවජාත පරපුරකින් එන බැවින් එය කිසි දා යටට මුල් නොඅදිනු ඇත. 
කිසි දා තිර පදනමක් නොදමනු ඇත. 
4 කලකට එහි අතු රිකිලි ඇති විය හැකි ය. 
එහෙත් එය හොඳින් මුල් ඇද නැති බැවින් සුළඟට සෙල වී චණ්ඩ කුණාටුවෙන් ඉදිරී වැටෙනු ඇත. 
5 තරමක් වැඩෙනු පෙර එහි අතු කැඩී බිඳී යනු ඇත. 
ඒවායේ ඵල නිෂ්ඵල ය. 
ඒවා කෑමට තරම් පැසී නැත; 
ඒවා කිසිවකට සුදුසු නැත. 
6 දෙවිඳුන් විනිශ්චය කරන විට, පාප සේවනයෙන් උපත ලැබූ දරුවන් ඔවුන්ගේ දෙමාපියන් කළ වරදට සාක්ෂි දරනු ඇත.

දැහැමියාගේ අකාල මරණය

7 දැහැමියා අකාලයේ මියගියත් සැනසුම ලබයි. 
8 වයසට ගරුසරු ලැබෙන්නේ දිගායුසෙන් නොවේ. 
ජීවිතයේ සැබෑ මිම්ම ද අවුරුදු ගණන නොවේ. 
9 මිනිසාගේ පැසුණු කෙස් නම්, තේරුම්ගැනීමේ ශක්තිය යි. 
පැසුණු මහලු විය නම්, නොකැළැල් ජීවිතය යි. 
10 දැහැමියා දෙවිඳුන් ප්‍රසන්න කිරීමට සෙවූ බැවින් එතුමාණෝ ඔහුට ප්‍රේම කළ සේක. 
පවිටුවන් අතර ජීවත් වෙද්දී ම ඔහු ඔසවාගනු ලැබී ය. 
11 ඔහු රැගෙන ගියේ නපුර ඔහුගේ තේරුම්ගැනීම විකෘති නොකරන පිණිස ය.
ද්‍රෝහිකම ඔහු දූෂණය නොකරන පිණිස ය. 
12 නපුර කෙරෙහි ඇති සිත් ඇලුම්කම යහපත් දේ පරදවාලයි. 
තණ්හාව නමැති සුළඟ අවංක සිත දූෂණය කරයි. 
13 කෙටි කලකින් සම්පූර්ණත්වය ලබාගත් බැවින් ඔහු දිගායු වැළඳී ය.
14 ඔහු සමිඳුන්ට ප්‍රසන්න වූ නිසා එතුමාණෝ, ඔහු වටකර තිබූ දුෂ්ටකමින් ඔහු විගස මුදාගත් සේක.
එහෙත් ඒ සෙනඟ තේරුම් නොගෙන ඔහු දෙස බලා සිටිති. 
එය ඔවුන්ට අවබෝධ වී නැත. 
15 වරප්‍රසාදය සහ දයාව දෙවිඳුන් විසින් තෝරාගනු ලැබූ අයට ලැබෙනු ඇත. 
එතුමන්ගේ සැදැහැවතුන්ට රැකවරණය ලැබෙනු ඇත. 
16 මියයන දැහැමියා ජීවත් ව සිටින අභක්තිකයා හෙළා දකියි. 
තරුණයාගේ අකාල මරණය ද දුෂ්ටයාගේ දිගුකල් ජීවත් වීම ද හෙළා දකියි; 
17 සමිඳාණන් පැණවතා සඳහා අරමුණු කර ගත් දේ හො‍් එතුමන් ඔහු රැකවරණයට ගන්නේ මන්ද කියා හො‍් තේරුම් නොගෙන, මේ අය පැණවතාගේ අවසානය දකිති. 
18 ඔව්හු බලා සිට අපහාස කරති. 
එහෙත්, සමිඳාණෝ ඔවුන් බලා සිනාසෙන සේක. 
19 ඔවුන් විගස ගරුසරු නැති මළකඳන් වනු ඇත; 
මියගියවුන් අතර සදහට ම නින්දාවට ලක් වනු ඇත. 
සමිඳාණෝ ඔවුන් නිහඬ කරවමින් ඔවුන්ට තදින් පහර දෙන සේක. 
ඔවුන්ගේ පදනම්වලින් ඔවුන් උදුරා දමන සේක; 
ඔවුන් සම්පූර්ණයෙන් ම වනසාලනු ඇත. 
සන්තාපය ඔවුන්ට හිමි වනු ඇත. 
ඔවුන් ගැන සිහි කිරීම මැකී යන්නේ ය. 
20 ඔවුන්ගේ පාප ගැන ගණන් දීමට ඔව්හු වෙවුල වෙවුලා එන්නො‍් ය. 
ඔවුන්ගේ අපරාධ ඔවුන්ට විරුද්ධ ව චෝදනා කරනු ඇත.

 

– 5 වන පරිච්ඡේදය –

විනිශ්චය දිනයේ දී

1 එවිට තමන්ට පීඩා කළ තැනැත්තාට ද, තමන්ගේ දුක් වේදනා ගැන නොසැලකූ අයට ද විරුද්ධ ව, නිර්භීත ව මුහුණ පෑමට දැහැමියා නැඟිටිනු ඇත. 
2 දැහැමියා බලාපොරොත්තු නොවූ ලෙස ගැළවී ඇති බව ඒ අය දැක මවිත වී ඔහු ඉදිරියෙහි බියසුල්ලන් මෙන් වෙවුලන්නො‍් ය. 
3 කණගාටුවෙන් මිරිකී සුසුම්ලමින් ද, හිත් වේදනාවෙන් ද ඔවුන් එකිනෙකාට මෙසේ කියනු ඇත. 
4 ”කලක් අප සිනහ වූයේ මොහු ගැන ය; 
අපේ ඇනුම්පදවලට ගොදුරු වූයේ මොහු ය. 
අපි කෙතරම් අනුවණයෝ ද? 
අප ඔහුගේ ජීවිතය සැලකුවේ උමතුවක් ලෙස ය.
ඔහුගේ මරණය ගෞරවයෙන් තොර ව කෙළවර වේ. 
5 දෙවියන් වහන්සේගේ පුත්‍රයකු මෙන් ඔහු ගණන්ගනු ලැබුයේ කෙසේ ද? 
ශුද්ධවන්තයන් අතර තැනක් ලැබුයේ කෙසේ ද? 
6 අපි නම්, ඇත්තට ම සත්‍යයේ මාර්ගයෙන් මංමුළා වී ගියෙමු. 
යුක්තියේ ආලෝකය අප කෙරෙහි නොබැබළිණි. 
කිසි දිනක අප මත ඉර උදා නොවූයේ ය. 
7 නීති විරො‍්ධි වූ ද, විනාශකාරී වූ ද මාවත් සියල්ලක ම අපි ගමන් කෙළෙමු.
පාරක් තොටක් නැති මරුකතරක් හරහා අපි ගියෙමු. 
එහෙත් අපි කිසි දා සමිඳුන් මඟ නුදුටිමු. 
8 අපි අහංකාර වූයෙමු; 
ඉන් අප ලබාගත් වාසිය කිමෙක් ද? 
සම්පත හා පාරට්ටුව අපට තිබිණි. 
ඒවායින් අපට ලැබුණේ කිමෙක් ද? 
9 ඒවා සියල්ල ම ගෙවී යන සෙවණැල්ලක් මෙන් ද, නැති වී යන දූෂමාන ආරංචියක් මෙන් ද අතුරුදහන් වී ඇත. 
10 නඟින රැළි මැදින් යන නැවක් එය ගිය මං සටහන් ඉතිරි නොකරන පරිදි, රළ මත නැව ගිය දිය පාර නොතිබෙන පරිදි, ඒවා සියල්ල අතුරුදහන් වී ඇත. 
11 අහසේ පියාඹන පක්ෂියෙකු ඌ ගිය මඟ සටහන් නොතබන පරිදි ද ඌ සිහින් සුළඟේ අත්තටු ගසමින් අහස දෙවනත් කොට වේගයෙන් විදහා ලූ අත්තටු සහිත ව ඉදිරියට අහස පීරාගෙන යන විට ඌ ගිය මඟ ලකුණක් නොතබන පරිදි ද ඒවා සියල්ල අතුරුදහන් වී ඇත. 
12 ඉලක්කයට එල්ල කළ ඊගසක් එය අවට ඇති සුළඟ විනිවිද ගොස් එය ගිය මඟ ලකුණු නොතබන පරිදි ද ඒවා සියල්ල අතුරුදහන් වී ඇත. 
13 අපට ද එලෙස වී තිබේ. දිවි උපත ලැබුවා පමණ ය; 
එවිට ම මරණ විපත ලැබුවෙමු. 
දැහැමිකම ගැන කිසි ම ලකුණක් වත් අපට පෙන්විය නොහැකි ය.
එය වෙනුවට අපි දුෂ්ටකමින් ජීවත් වූයෙමු.” 
14 එසේ ය, අභක්තිකයන්ගේ බලාපොරොත්තුව සුළඟේ ගසාගෙන යන බොල් වී හා සමාන ය.
කුණාටුවට ගසාගෙන යන දිය හුමාලයට සමාන ය. 
සුළඟට අසු වූ දුම මෙන් එය විසිරී යයි. 
දිනකට පමණක් පැමිණි අමුත්තෙකුගේ මතකය මෙන් එය පහ වී යයි.
15 එහෙත්, දැහැමියෝ සදහට ම ජීවත් වෙති. 
ඔවුන්ගේ විපාකය සමිඳාණන්ගෙන් ය. 
අති උතුම් තැනැන් වහන්සේ ඔවුන් ගැන සලකන සේක. 
16 එබැවින් ඔව්හු සමිඳුන්ගේ අතින් ශෝභනත්වයේ චූඩා මාණික්‍ය වන දිළිසෙන රාජකීය කිරීටයක් ලබනු ඇත. 
මන්ද, එතුමාණෝ සිය දකුණතින් ඔවුන්ට රැකවරණය දෙන සේක. 
සිය බාහුවෙන් ඔවුන් ආරක්ෂා කරන සේක. 
17 නොඉවසන සුලු ප්‍රේමය නමැති සන්නාහය ඔහු පළඳිනු ඇත.
සිය සතුරන්ට දඬුවම් දෙනු පිණිස හිමි තුමාණෝ මැවිල්ල සන්නාහ සන්නද්ධ කරවන සේක.
18 ළය වැස්ම මෙන් යුක්තිය පළඳිනු ඇත. 
හිස් වැස්ම මෙන් සාධාරණ විනිශ්චය පළඳිනු ඇත. 
19 පලිහ මෙන් පැරදවිය නොහැකි ශුද්ධවන්තකම ගනු ඇත. 
මුවහත් කඩුවක් මෙන් සිය දැඩි උදහස තළා සකස් කරනු ඇත. 
20 මෙලෙස ඔහු සමඟ මුළු විනිශ්චය ම සාහසිකයන්ට විරුද්ධ ව යනු ඇත. 
21 අදින ලද දුන්නකින් ඊගස් ඉලක්කයට යන පරිදි හෙණ අකුණු සහ සැලෙන විදුලි පහර වලාකුළු පීරාගෙන අවුත් ඉලක්කය කරා යනු ඇත. 
22 ගල් පටියක් ද කෝපාවිෂ්ට හිම කැට විසි කරනු ඇත. 
සත් සමුදුර ජලය ද ඔවුන්ට විරුද්ධ ව උදහස් වනු ඇත. 
ගංගාවෝ ද අනුකම්පා විරහිත ව ඔවුන් ගොදුරු කරගන්නො‍් ය. 
23 මහා බලවත් මාරුතයක් ඔවුන්ට විරුද්ධ ව හමනු ඇත. 
කුණාටුවකින් මෙන් ඔවුන් පොළනු ලබනු ඇත. 
මෙලෙස නීති විරො‍්ධීහු මුළු පොළොව වනසන්නො‍් ය. 
නපුර කරන්නො‍් බලවතුන්ගේ සිහසුන් පෙරළා දමන්නො‍් ය.

 

– 6 වන පරිච්ඡේදය –

ධර්මිෂ්ඨ භාවයේ රාජ ධර්මය

1 රජවරුනි, සවන් දී තේරුම්ගන්න; 
දුර රටවල පාලකයෙනි, පරිස්සම් වන්න. 
2 ඔබ සැමගේ අණසක යට දහසක් දෙන පාලනය කරන්නෙනි, ඔබේ පුරවැසියන් විශාල සංබ්‍යාව ගැන පාරට්ටු කරන්නෙනි, මෙයට සවන් දෙන්න. 
3 බලය වූ කලී, ඔබට සමිඳුන්ගෙන් ලැබෙන දීමනාවකි. 
පරමාධිපත්‍යය, අති මහො‍්ත්තමයාණන්ගෙන් පැමිණෙන්නකි. 
එතුමාණෝ ඔබේ ක්‍රියා විමසා බලන සේක; 
ඔබේ අදහස් සියුම් ලෙස පරීක්ෂා කරන සේක. 
4 රාජ්‍යයේ පරිපාලකයන් වශයෙන් ඔබ සාධාරණ ලෙස පාලනය නොකළාහු නම්, ව්‍යවස්ථාව නොපිළිපැද්දාහු නම්, දෙවිඳුන්ගේ අභිමතය පරිදි නොහැසුරුණෝ නම්, 
5 එතුමාණන් ඔබ වෙත වේගයෙන් ද භයානක ව ද පැමිණෙනු ඇත. 
බලවතුන් හට සහ ප්‍රභූන් හට කෲර විනිශ්චයක් වෙන් කර ඇත. 
6 බැගෑපත් අයට අනුකම්පා සහගත ව කමා කරනු ලැබේ. 
බලවත් අයට දරුණු ලෙස දඬුවම් කරනු ලැබේ. 
7 සියල්ලන්ට අධිපති සමිඳාණන් කිසි කෙනෙකු අබිමුව බියෙන් මිරිකෙන්නේ නැත. 
මහන්තත්වය ගැන විස්මිත නොවනු ඇත. 
මන්ද, එතුමාණෝ ම ලොකු කුඩා සියල්ලන් මැවූ සේක. සියල්ලන්ට ම එක ලෙස සියලු දේ සපයන සේක. 
8 එහෙත්, එතුමාණෝ බලයේ සිටින අය දැඩි ලෙස පරීක්ෂා කොට බලන සේක. 
9 එසේ ය, රජවරුනි, ප්‍රඥාව කුමක් ද කියා ඔබ ඉගෙනගෙන වරද නොකරන ලෙස මාගේ වචනය දෙන්නේ ඔබට ය. 
10 මන්ද, ශුද්ධ දේ ශුද්ධ ලෙස පිළිපදින අය ශුද්ධවන්තයන් මෙන් ගණන්ගනු ඇත. 
ඔවුන්ගෙන් උපදෙස් ලබාගැනීම නිසා ඔවුන් තුළ ඔවුන් හට ආරක්ෂාව සැලසෙනු ඇත. 
11 එබැවින් මාගේ වචනය පැමිණෙන තෙක් බලා සිටින්න; 
ඊට ආශාවෙන් සිටින්න; 
එය ඔබට උපදෙස් දෙනු ඇත.

ප්‍රඥාව සොයා යාම

12 ප්‍රඥාව දීප්තිමත් ය. 
ඇය මලානික නොවේ. 
ඇයට ප්‍රේම කරන අයට ඇය හොඳින් පෙනේ.
ඇය සොයන අය ඇය ලබාගනු ඇත. 
13 තමාට ආශා කරන අය ගැන ඇය කලින් දැනගෙන ඔවුන්ට ප්‍රකාශ වනු ඇත. 
14 ඇය එන තෙක් වේලාසනින් බලා සිටින්න. 
ඔබට කරදරයක් නොවනු ඇත. 
ඔබේ දොරටු ළඟ ඇය සිටිනු ඔබට හමු වේ. 
15 ඇය ගැන සිතීම පවා අංග සම්පූර්ණ දැනීමක් ලැබීම ය. 
ඇය ගැන පරීක්ෂාකාරී ව සිටින්න. 
එවිට, විගස, කරදර ඔබෙන් දුරුවනු ඇත. 
16 ඇය ලබාගැනීමට සුදුසු අය සොයමින් ඇය සැරිසරනු ඇත. 
ඔවුන්ගේ මාර්ගවල දී විනීත ලෙස මුණගැසී ඔවුන්ගේ සිත්සතන් තුළ ප්‍රකාශ වනු ඇත. 
17 ඇය ලබාගැනීමේ ආරම්භය නම්, විනයගරුක වීමට ආශාව යි. 
විනයගරුක වීමට ආශාව නම් ප්‍රඥාවට ප්‍රේමය දැක්වීම යි. 
18 ඇයට ප්‍රේමය දැක්වීම නම්, ව්‍යවස්ථාව රැකීම යි. 
ව්‍යවස්ථාව රැකීම නම්, අමරණීය භාවය සහතික කිරීම යි. 
19 අමරණීය භාවය දෙවිඳුන් ළඟට අප ගෙන එයි. 
20 ප්‍රඥාවට ආශාව දැක්වීම පරමාධිපත්‍යයට මඟ පෙන්වයි. 
21 එබැවින්, ජාතීන්ගේ අධිපතියනි, ඔබ සිහසුනට සහ ජයකොන්තයට කැමැති නම්, ප්‍රඥාවට ගරු කරන්න; 
සදහට ම ඔබ රජකම් කරනු ඇත.

ප්‍රඥාව විස්තර කිරීම

22 ප්‍රඥාව කුමක් ද කියාත් ඇය ආවේ කෙසේ ද කියාත් මම දැන් ප්‍රකාශ කරමි. 
එහි කිසි ම රහසක් මම සඟවා නොතබමි. 
පටන්ගැන්මේ සිට ම ඇයගේ මාර්ගය පෙන්වා දී සත්‍යයෙන් ඉවතට නොගොස් පැහැදිලි ව ඇය දැනගැන්ම මම ඉදිරිපත් කරමි. 
23 මා සමඟ යන මිතුරා ලෙස මම විනාශකාරී ඊර්ෂ්‍යාව සහාය කොට නො ගනිමි. 
මන්ද, ඊර්ෂ්‍යාව හා ප්‍රඥාව අතර පොදුවේ කිසිත් නැත. 
24 ලොව විමුක්තිය ඇත්තේ පැණවතුන් විශාල සංබ්‍යාවක් තුළ ය. 
ජාතික චිරස්ථිතිය ඇත්තේ පැණවත් රජකු තුළ ය. 
25 එබැවින්, මාගේ වචනවලින් ඉගෙනගන්න. 
ඔබට එය වැඩදායක වනු ඇත.

– 7 වන පරිච්ඡේදය –

සලමොන් රජ සාමාන්‍ය මිනිසෙකි

1 අන් සියලු අය මෙන් මම ද මැරෙන සුලු කෙනෙක්මි. 
පසින් සාදන ලද පළමු තැනැත්තාගෙන් පැවත එන්නෙමි. 
මම මා මවු ගැබෙහි මාංශ පේශි ඇති ව වැඩුණෙමි. 
2 සැතපීමේ දී ඇති වූ අනුරාගයෙන් හා ශුක්‍ර ධාතූන්ගෙන් පෝෂණය වී උපත ලැබුවෙමි. 
මවගේ ලෙයින් ආවරණය වී දස මසක් මම හැඩ ගැසුණෙමි. 
3 මම උපත ලැබූ විට හුස්ම ගත්තෙමි. 
අප සිටින පොළොව මත මම වැටුණෙමි. 
අන් අය මෙන් මම ද පළමු වරට හැඬුවෙමි. 
4 සැලකිලිමත් ලෙස මම හාන් රෙදිවලින් ඔතනු ලැබුවෙමි. 
5 මීට වඩා වෙනස් පටන්ගැන්මක් රජෙකුට වුවත් නැත. 
6 ජීවිතයට ඇතුල් වන මඟ ද ජීවිතයෙන් පිට වී යන මඟ ද සියල්ලන්ට ම එක සමාන ය.

සලමොන් රජ ප්‍රඥාවට ගරු කිරීම

7 ඉහත කී කරුණු නිසා, මම යාච්ඤා කෙළෙමි. 
මට දැනුම්පැහැදුම් දෙන ලදී. මම අයැදුම් කෙළෙමි. 
මට ප්‍රඥාව ලැබුණේ ය. 
8 රාජකොන්තයට හා සිහසුනට වඩා මම ප්‍රඥාව අගය කෙළෙමි. 
ඇය සමඟ සැසඳුන විට ධන සම්පත මම කිසිසේත් නොතැකීමි. 
9 ඇයට සමාන වටිනා මැණිකක් නොමැත. 
ඇය සමඟ සැසඳු විට රත්රන් සියල්ල වැලි මිටක් පමණ ය. 
ඇය ඉදිරියේ රිදී මඩ වැනි ය. 
10 ශරීර සනීපයට හා රූමත් බවට වැඩියෙන් මම ඇයට ප්‍රේම කෙළෙමි. 
ආලෝකයට වඩා මම ඇයට කැමැති වූයෙමි. 
මන්ද, ඇගේ දීප්තිය නිති නොමැලවී පවතියි. 
11 ඇය සමඟ මට යහපත් සියල්ල ලැබිණි. 
ඇය මඟින් අසංබ්‍ය වස්තු මට හිමිවුණි. 
12 ප්‍රඥාව මේ සියල්ල ගෙනෙන බැවින් මම ඒවා ගැන ප්‍රීති ප්‍රමො‍්ද වුණෙමි. 
එහෙත්, ඒවායේ මෑණියන් ප්‍රඥාව බව මම නොදැන සිටියෙමි. 
13 අවංක ව මා ඉගෙනගත් දේ මුළුමනින් ම මම බෙදා දෙමි. 
ඇගේ සම්පත සැඟවීමට මම නොසිතමි. 
14 ඇය වනාහි මිනිසුන් හට හිස් නොවන නිධානයකි. 
එය ලබාගන්නො‍් දේව මිත්‍රකම දිනාගන්නො‍් ය. 
ඇගේ ඉගැන්වීමේ ප්‍රයෝජනය නිසා ඔවුන් එතුමන් හට ප්‍රසන්න වනු ඇත.

සලමොන් රජ දේව අනුග්‍රහය අයැදීම

15 දෙවිඳුන් කැමැති පරිදි කතා කිරීමට එතුමාණෝ මට වරම් දෙන සේක් වා! 
එතුමාණන්ගේ දීමනාවන්ට ඔබින පරිදි අදහස් පැවසීමට මට වරම් දෙන සේක් වා! 
මන්ද, එතුමාණෝ ප්‍රඥාවේ මාර්ග දේශකයාණෝ ය. 
පැණවතුන්ට මඟ පෙන්වන්නේ එතුමාණෝ ය. 
16 අපි ද අපේ වචන ද සැබැවින් ම එතුමාණන්ගේ හස්තයෙහි ය. 
අපේ පැහැදුමත් කාර්මික දැනීමත් සමඟ අපි එතුමාණන්ගේ හස්තයෙහි ය. 
17 ලොව පවතින සියල්ල ගැන සැබෑ දැනුම මට දුන්නේ එතුමාණෝ ය. 
ලෝකයේ සැලැස්ම ද ලෝක ධාතු ලක්ෂණය ද 
18 කාලයාගේ මුල ද මැද ද අග ද අයනයන්ගේ මාරුවීම ද සෘතුවල විපර්යාසය ද 
19 අවුරුද්ද කරකැවීම ද පෘථිවියේ පරිභ්‍රමණය ද තාරකාවන්ගේ පිහිටීම ද 
20 සත්වයන්ගේ ස්වභාවය ද වන සතුන්ගේ ඉව ද භූතාත්මයන්ගේ බලය ද මිනිසුන්ගේ මානසික ක්‍රියා මාර්ග ද පැළෑටිවල විවිධත්වය ද පැළෑටි මුල්වල ගුණාගුණ ද මට ඉගැන්වූයේ එතුමාණෝ ය. 
21 සඟවන ලද දේ ද පැහැදිලි දේ ද ඒවා සියල්ල පිළියෙළ කළ ප්‍රඥාවන්තයාණන් වහන්සේ විසින් මට කියා දෙන ලදුව මම ඒවා දැනගත්තෙමි

ප්‍රඥාවේ මහිමය

22 ප්‍රඥාව තුළ ඇති ආධ්‍යාත්මය නැණ නුවණින් යුක්ත ය. 
ශුද්ධවන්ත ය; 
සුවිශේෂ ය; 
විවිධ ය; 
සියුම් ය; 
ක්‍රියාකාරී ය; 
කැපෙන සුලු ය; 
අකලංක ය; 
පැහැදිලි ය; 
පහර නොලබන සුලු ය; 
කාරුණික ය; 
මුවහත් ය; 
23 නොවැළැක්විය හැකි ය;
ත්‍යාගශීලී ය; 
මිනිසාට ප්‍රේම කරන සුලු ය;
ස්ථිර ය; 
විශ්වාස කටයුතු ය; 
නොකැළඹෙන සුලු ය; 
සවි බලැති ය, සියල්ල දකින සුලු ය; 
නුවණ ඇති ය; 
පවිත්‍ර හා ඉතා සියුම් ය; 
ආත්මයන් විනිවිද යන සුලු ය. 
24 ප්‍රඥාව අන් සියල්ලට වඩා කාර්යක්ෂම ය; 
ඇය ඉතා පිරිසිදු බැවින් සියල්ල විනිවිද යයි; 
සියල්ල තුළ ව්‍යාප්ත වෙයි. 
25 ප්‍රඥාව වනාහි දේව බලවේගයේ හුස්මය ය;
සවි බලැති දෙවිඳුන්ගේ මහිමයෙන් නික්ම එන පවිත්‍ර ප්‍රභවය ය; 
එබැවින් අපවිත්‍ර කිසිවකට එහි ඇතුළු විය නොහැකි ය. 
26 ඇය සදා ආලෝකයේ ප්‍රතිබිම්බය ය; 
ක්‍රියාශීලී දේව බලයේ අකලංක කැඩපත ය; 
එතුමාණන්ගේ යහපත්කමේ ස්වරූපය ය. 
27 හුදකලා ව සිටින නමුත්, ඇයට සියල්ල කළ හැකි ය. 
ඇය නොවෙනස් වන සුලු ය. 
ඇය සියල්ල අලුත් කරයි. 
සැම පෙළපතක ම ශුද්ධවන්තයන් තුළට ඇය පිවිසෙයි.
ඇය ඔවුන් දේව මිත්‍රයන් සහ දිවැසිවරුන් කරවයි. 
28 මන්ද, දෙවිඳුන් ප්‍රේම කරන්නේ ප්‍රඥාව සහිත ව ජීවත් වන මිනිසාට පමණක් ය. 
29 ඇය සූර්යයාට වඩා තේජාන්විත ය; 
ඇය සියලු තාරකා පංති අබිබවා බබළයි. 
ආලෝකය හා සැසඳු විට ඇය මුල් තැන ගනියි. 
30 මන්ද, ආලෝකය රාත්‍රියට ඉඩ දිය යුතු යි. 
එහෙත්, නපුරට නම්, 
කිසි දා ප්‍රඥාව ජයගත නොහැකි ය.

 

– 8 වන පරිච්ඡේදය –

1 පොළොවේ එක කොණක සිට අනික් කොණ දක්වා සියල්ල යහපතට මෙහෙයවමින්, ඇය සිය ශක්තිය භාවිත කරයි.

ප්‍රඥාවෙන් යහපත පැමිණීම

2 මම ප්‍රඥාවට ප්‍රේම කෙළෙමි; 
යොවුන් වියේ සිට මම ඇය සොයා ගියෙමි. 
මම ඇය මාගේ මනාලිය කරගැනීමට ඉටාගතිමි. 
ඇගේ රූපශ්‍රීයට ප්‍රේම කෙළෙමි. 
3 සව් බලැති සමිඳු ඇයට ප්‍රේම කළ බැවින්, දෙවිඳුන්ට ඇති ඇගේ සමීප බව නිසා ඇගේ උදාර උපතට දිස්නය වැටේ. 
4 එසේ ය, ඇය දේව දැනුම පිළිබඳ අබිරහස්වල පටන්ගැන්මකි. 
ඇය දේව ක්‍රියාවන් තෝරා දෙයි. 
5 මේ දිවියේ දී ආශා විය යුතු සම්පතක් නම්, දස දෙස ක්‍රියා කරන ප්‍රඥාවට වඩා ධනවත් කුමක් ද? 
6 බුද්ධිය කාර්යක්ෂම නම්, සියල්ලේ නිර්මාතෘවරයාණන් වන ප්‍රඥාවට වඩා ශ්‍රේෂ්ඨ කවරෙක් ද? 
7 ඔබ ප්‍රේම කරන්නේ දැහැමිකමට නම්, ඇගේ ශ්‍රමයේ ප්‍රතිඵල දැහැමි ගතිගුණ වේ; 
මන්ද, ආත්ම දමනය සහ නැණවත්කම ද සාධාරණකම සහ ධෛර්යවන්ත බව ද උගන්වන්නේ ප්‍රඥාව ය. 
මේවාට වඩා කිසිවක් ජීවිතයේ දී වැඩදායක නොවේ. 
8 ඔබ මනා පළපුරුද්දක් ලැබීමට ආශා නම්, ප්‍රඥාව අතීතය දන්නී ය; 
අනාගතය ගැන කල්තියා කියන්නී ය; 
ආප්තෝපදේශ යෙදීමටත්, ගැටළු විසඳීමටත් ඈ දන්නී ය. 
නිමිති සහ හාස්කම් ගැන ද සෘතු හා යුගයන් උදාවීම ගැන ද ඇයට දැනුම් දී ඇත.

ප්‍රඥාවේ අවශ්‍යතාව

9 එබැවින් මම මාගේ සමෘද්ධියේ දී ඇය මාගේ උපදේශකයා කරගන්නා ලෙසත්, දුක් කරදරවල දී මාගේ සැනසිල්ල කරගන්නා ලෙසත්, ඇය මාගේ ජීවිතයේ කොටස්කරු කරගැනීමට ඉටාගතිමි. 
10 මා යොවුන් වියේ සිටි නමුත් සෙනඟ එක්රැස් වූ ස්ථානවල දී ඇය මඟින් ප්‍රජා මූලිකයන් අතර ප්‍රසිද්ධියේ ගෞරවය ලැබීමට සිතාගතිමි. 
11 මා විනිශ්චයාසනාරූඪ ව සිටින විට දක්ෂ කෙනෙකු සැටියට ගණන්ගනු ඇත. 
ශ්‍රේෂ්ඨයන් අතර මට ගරු නම්බු ලැබෙනු ඇත. 
12 මා නිහඬ ව සිටින විට ඔවුන් බලා සිට, මා කතා කරන විට මට අවධානය යොමු කරනු ඇත.
මා තරමක් දුරට කතා කළොත් ඔවුන් ඔවුන්ගේ කට වසාගෙන නිහඬ වනු ඇත. 
13 ඇයගේ මාර්ගයෙන් මට අමරණීය බව අත් වනු ඇත. 
මට පසු ව මගේ පදවිය දරන අය සදා මා සිහි කරනු ඇත. 
14 මම සෙනඟ පාලනය කරන්නෙමි. 
ජාතීන් මට යටත් වනු ඇත. 
15 මාගේ නම සඳහන් කරන විට බිහිසුණු රාජ්‍ය නායකයෝ තැතිගන්නො‍් ය.
මාගේ සෙනඟට මම කරුණාව දක්වමි. 
සටනේ දී වික්‍රමාන්විත බව මම පෙන්වීමි. 
16 මා ගෙදර ගිය විට ඇය සමඟ සුව සේ වසන්නෙමි. 
ඇය ඇසුරු කරන විට කිසිත් නීරස නොවේ; 
ඇය මාගේ ජීවිතයේ හවුල්කාරී වන විට වේදනාවක් නැත. 
ඇත්තේ ප්‍රීතිය පමණකි, සතුට පමණකි.

ප්‍රඥාව අයැදීම

17 මාගේ ඇතුළාන්තයේ මම මේ සිතුවිලි ගැන පෙරළ පෙරළා කල්පනා කෙළෙමි. 
18 ප්‍රඥාව ඇසුරු කිරීමෙන් අමරණීය භාවය ලැබෙන බව ද, ඇය සමඟ මිතුරුකමින් පිරිසිදු තෘප්තිය අත් වන බව ද, ඇයගේ ක්‍රියා තුළ අසීමිත සම්පත හිමි වන බව ද, ඇය ඇසුරෙන් නැණනුවණ උදා වන බව ද, ඇය සමඟ සුහද කතාවෙන් කීර්තිය හිමි වන බව ද මා සිතින් සිතා යම් හෙයකින් ඇය මා සතු කරගනු පිණිස මම දස දිසාවේ ගමන් කෙළෙමි. 
19 මම යහපත් ගතිගුණ ඇති තරුණයෙක් වී සිටියෙමි. 
මාගේ උරුමය මෙන් මම දැහැමි පැවතුම් ලැබුවෙමි. 
20 මා යහපත් කෙනෙකු වූ බැවින් අකලංක සිරුරකට ඇතුළු වූයෙමි. 
21 එහෙත්, දේව දීමනාවක් මිස ප්‍රඥාව අත් කරගැනීමට මට නොහැකි බව දැන මම සමිඳුන් වෙත හැරී අයැදුම් කෙළෙමි.
මන්ද, ප්‍රඥාව වනාහි දෙවිඳුන් සතු දෙයක් බවට ලකුණකි. 
මම මුළු සිතින් මෙසේ කීවෙමි.

– 9 වන පරිච්ඡේදය –

ප්‍රඥාව සඳහා අයැදුම

1 අපේ පියවරුන්ගේ දෙවිඳුනි, දයාවේ සමිඳුනි, ඔබ තම වචනයෙන් සියල්ල මවා වදාළ සේක. 
2 ඔබෙන් පැමිණි මැවිලි පාලනය කරන පිණිසත්, සැදැහැවත්කමින් හා සාධාරණකමින් ලොව පාලනය කරන පිණිසත්, 
3 අවංක ලෙස පාලන බලය මෙහෙයවන පිණිසත් ඔබ ප්‍රඥාව මඟින් මිනිසා පිළියෙළ කළ සේක. 
4 ඔබේ සිහසුන අසල අසුන්ගත් ප්‍රඥාව මට දුන මැනව. 
ඔබගේ සේවකයන් අතුරින් මා නෙරපා නොදැමුව මැනව. 
5 මම වනාහි ඔබේ සේවිකාවන්ගේ පුත්‍රයා වන ඔබේ මෙහෙකරුවෙකි; 
දුබල මිනිසෙකි, මඳ ආයු ඇති කෙනෙකි; 
යුක්තිය හා ව්‍යවස්ථාව ගැන මට ඇත්තේ අල්ප දැනුමකි. 
6 මිනිසුන් අතර සර්ව සම්පූර්ණ කෙනෙකුට වේ වා, ඔබෙන් පැමිණෙන ප්‍රඥාව නැත්නම්, ඔහු ගණන්ගනු ලබන්නේ නිෂ්ඵල කෙනෙකු මෙනි. 
7 ඔබේ ජනතාව කෙරෙහි රජු වශයෙන් ඔබේ දරුදැරියන් විනිශ්චය කරනු පිණිස ඔබ මා තෝරාගත් සේක. 
8 ආරම්භයේ පටන් ඔබ සූදානම් කළ ශුද්ධ මණ්ඩපයේ ප්‍රතිරූපයක් වන දේව මාලිගාවක් ඔබේ සුවිශුද්ධ කන්ද මත ද ඔබේ කූඩාරම තැනූ නගරයේ පූජාසනයක් ද ඉදිකිරීමට ඔබ මට අණ කළ සේක. 
9 ඔබ සමඟ ප්‍රඥාව ඇත. 
ඈ ඔබේ වැඩ දන්නී ය. 
ඔබ ලෝකය සෑදූ විට ඈ ඔබ සමඟ සිටියා ය.
ඔබ ඉදිරියේ ප්‍රසන්න දේ ද ඔබගේ ආඥාවට අනුකූල වන දේ ද ඈ තේරුම්ගත්තී ය. 
10 ඇය සියල්ල දැන තේරුම්ගෙන ඇති බැවින් මට සහාය දීමටත්, මා සමඟ වැඩ කිරීමටත්, ඔබට ප්‍රසන්න දේ මට ඉගැන්වීමටත්, සුවිශුද්ධ සගලොවින් ඇය එව්ව මැනව. 
11 ඔබේ තේජාන්විත සිහසුන වෙතින් ඇය එව්ව මැනව. 
මාගේ ක්‍රියාවල දී ඇය නැණනුවණින් මට මඟ පෙන්වනු ඇත. 
ඇගේ තේජසින් මා රක්ෂා කරනු ඇත. 
12 එවිට මා කරන සියල්ල පිළිගනු ඇත. 
මම ඔබේ සෙනඟ යුතු ලෙස පාලනය කරන්නෙමි. 
මාගේ පියාගේ සිහසුනට සුදුසු කෙනෙක් වන්නෙමි. 
13 දේව අදහස් කුමන මිනිසකුට දත හැකි ද? 
සමිඳුන්ගේ කැමැත්ත කා හට දැනගන්නට හැකි ද? 
14 මැරෙනසුලු මිනිසාගේ කල්පනා සීමිත ය; 
අපේ අදහස් චපල ය. 
15 මන්ද, මැරෙනසුලු කය ආධ්‍යාත්මයට පීඩා කරයි. 
පසින් සෑදුණු මේ ගත, සිතුවිලි ගහණ බුද්ධියට බරකි. 
16 මිහි පිට ඇති දේ ගැන අනුමානකොට සිතීම පවා දුෂ්කර ය. 
අපට ලබාගත හැකි දේ දැනගැනීම දුෂ්කර ය. 
එසේ තිබිය දී සගලොව ඇති දේ සොයාගත හැක්කේ කා හට ද? 
17 ඔබ ප්‍රඥාව නුදුන් සේක් නම්, ඔබ ඉහළින් ශුද්ධාත්මානුභාවය නොඑවූ සේක් නම් ඔබේ අදහස් ගැන කා හට ඉගෙනගත හැකි වේ ද? 
18 මෙලෙස ප්‍රඥාව මඟින් මිහි පිට අයගේ ගමන් මාර්ගය කෙළින් කරනු ලැබ ඔබට ප්‍රසන්න දේ ඔවුන්ට උගන්වා ගැළවීම ලබා දී ඇත.

 

– 10 වන පරිච්ඡේදය –

ප්‍රඥාව මඟින් රැකවරණය

1 මිනිස් වර්ගයාගේ පියා වූ මවනු ලැබූ පළමු මිනිසා තනි ව මවන ලදී. 
ඔහුගේ රැකවල්කරු ප්‍රඥාව වූවා ය. 
ඈ ඔහු පවින් මුදාගත්තා ය. 
2 සියල්ල පාලනය කිරීමට ඈ ඔහුට ශක්තිය දුන්නා ය.
3 එක් මිනිසෙක් සිය උදහසින් පවිටුවෙකු වී, ඇය එපා කළ පසු ඔහු තම සහෝදරයා සමඟ විරුද්ධ ව ඇති කරගත් කෝපාග්නියෙන් නැසී විනාශ විය. 
4 ඔහුගේ පාපය නිසා පොළොව ජල ගැල්මට යට වූ විට කුඩා ලී කොටයක් උඩ සිටි දැහැමි මිනිසෙකු හට මඟ පෙන්වමින් ඒ මිනිසා යළි මුදාගත්තේ ප්‍රඥාව විසින් ය. 
5 යළි දුෂ්ටකමට පංගුකාරයන් වී ජාතීන් අවුල්වියවුල්වලට භාජන වූ විට දැහැමි මිනිසෙකු තෝරාගන්නා ලද්දේ ප්‍රඥාව විසින් ය. 
දැහැමි මිනිසෙක් දෙවිඳුන් අබිමුව නිදොස් කෙනෙකු ලෙස ප්‍රඥාව විසින් ආරක්ෂා කරන ලදී. 
සිය දරුවා කෙරෙහි වූ අනුකම්පාව ඉදිරියේ ප්‍රඥාව ඔහු දිරිමත් කළා ය. 
6 නගර පහ මත ගිනි වැසි වසින විට දැහැමි මිනිසෙකු පලා යද්දී, අභක්තිකයන් මිය යද්දී ඔහු ගළවා ගත්තේ ප්‍රඥාව විසින් ය.
7 පවිටු මඟට විරුද්ධ ව සාක්ෂ්‍ය දරමින්, ඒ දේශය තවමත් දුම් දමයි. 
එහි ඇති පැළෑටිවල පල කිසි දා නොපැසෙයි. 
අවිශ්වාස කෙනෙකුට ඉදිකළ සිහිවටනයක් වන ලුණු කණුවක් එහි පිහිටා ඇත.
8 ප්‍රඥා මඟ ඉවත ලූ බැවින් යහපත පිළිබඳ දැනුම ඔවුන්ට නැතිවිය. 
ඔවුන්ගේ අපරාධ නොනස්නා ලෙස ප්‍රකාශ වන ලෙස ඔව්හු ඔවුන්ගේ මො‍්ඩකම පිළිබඳ සිහිවීමක් ඇත්තෙන් ම ලොවට තබා ගියෝ ය.
9 ප්‍රඥාව ඇගේ සේවකයන් කරදරවලින් මිදුවා ය. 
10 දැහැමියා සිය සොහොයුරාගේ කෝපයෙන් පලා යන විට ඔහුට යහ මඟ යාමට මඟ පෙන්වන ලද්දේ ප්‍රඥාව විසින් ය.
ඈ ඔහුට දේව රාජ්‍යය පෙන්වා දී ශුද්ධ දේ ගැන දැනුම දුන්නා ය. 
ඈ ඔහුට තම ශ්‍රමයේ ඵල ලබා දී තම වෙහෙසමහන්සියේ ප්‍රතිඵල දුන්නා ය. 
11 පීඩාකාරී මසුරු මිනිසුන්ගෙන් මිදීමට ඈ ඔහුට සහාය දී ඔහු ධනවත් කළා ය. 
12 ඈ ඔහු සතුරන්ගෙන් ආරක්ෂා කොට ඔවුන් ඔහුට ඇටවූ උගුල්වලින් ඔහු ගැළෙව්වා ය. 
බැතිමත්කම සියල්ලට වඩා ශක්තිමත් බව පෙන්වා දෙන පිණිස දැඩි සටනක දී ඈ ඔහුට ත්‍යාගයක් ප්‍රදානය කළා ය. 
13 දැහැමියා විකුණනු ලැබූ විට ඈ ඔහු අත් නොහැර ඔහු පවින් නිදොස් කොට තබාගත්තා ය. 
14 ඈ ඔහු සමඟ අඳුරු හිර ගෙයට ගියා ය. 
ඔහුගේ සිර විලංගුවල ඔහු අත් නොහැර රාජ්‍යයක ජයකොන්තය ද සාහසික අධිපතීන් කෙරෙහි බලය ද ඔහුට ලබා දී ඔහුට චෝදනා කළ අය බොරුකාරයන් බව පෙන්වා ඔහුට සදා ගෞරවය දුන්නා ය.

නික්මයාම සිද්ධියෙහිදී ප්‍රඥාවේ මඟපෙන්වීම

15 පීඩාකාරී ජාතියකින් ශුද්ධ වූ සෙනඟක් ද නිදොස් වංශයක් ද ප්‍රඥාව විසින් ගළවාගන්නා ලදී. 
16 ඈ සමිඳුන්ගේ සේවකයාගේ ආධ්‍යාත්මයට ඇතුළු වී අරුමපුදුම දේ හා ලකුණු පෙන්වා බියජනක රජුන්ට විරුද්ධ ව නැඟී සිටියා ය. 
17 සැදැහැවතුන් හට ඔවුන්ගේ ශ්‍රමයේ වේතනය ඈ දානය කළා ය. 
ඈ පුදුම මඟකින් ඔවුන් ගෙන ගියා ය. 
ඈ දිවා කාලයේ ඔවුන්ට රැකවරණය වූවා ය; 
රෑ කාලයේ ඔවුන්ට තරු එළිය වූවා ය. 
18 ඈ ඔවුන් රතු මුහුද මැදින් ගෙන ගොස් මහා ජලස්කන්ධයක් මැදින් ඔවුන්ට මඟ පෙන්වූවා ය.
19 ඈ ඔවුන්ගේ සතුරන් රළ පතරේ ගිල්ලෙව්වා ය. 
ඉන්පසු මුහුදු පත්ලෙන් ඔවුන් පිටත දැමුවා ය. 
20 මෙසේ දැහැමියෝ නොදැහැමියන් කොල්ලකෑවෝ ය. 
ස්වාමීනි, ඔව්හු ඔබේ සුවිශුද්ධ නාමය උසස් ලෙස වර්ණනා කළො‍් ය. 
රැකවරණය දෙන ඔබේ හස්තය ඒකමතික ව පැසසුවෝ ය. 
21 මන්ද, ප්‍රඥාව ගොළුවන්ගේ මුඛ විවෘත කළා ය. 
සිඟිත්තන් හට කතාවේ වරය දුන්නා ය.

 

– 11 වන පරිච්ඡේදය –

පාළුකරය මැදින් ප්‍රඥාව මඟපෙන්වීම

1 ශුද්ධ දිවැසිවරයෙකු මඟින් ප්‍රඥාව ඔවුන්ගේ ක්‍රියා සාර්ථක කළා ය. 
2 ඔව්හු ජන ශූන්‍ය පාළුකරයක ගමන් කොට පහසුවෙන් යා නොහැකි තැන්වල කූඩාරම් බැන්දෝ ය. 
3 ඔව්හු තමන්ගේ සතුරන්ට එරෙහි ව නැඟිට ඔවුන් පරාජය කළො‍් ය. 
4 ඔව්හු පිපාසාවෙන් සිටින විට ඔබට හඬගැසුවෝ ය. 
එවිට ඔවුන් හට ගිරි කඳුරකින් වතුර දෙනු ලැබී ය. 
මෙලෙස දැඩි කළු ගලින් ගලා ආ ජලයෙන් ඔවුන්ගේ පිපාසය සන්සිඳවිණි.
5 මෙලෙස ඔවුන්ගේ සතුරන්ට දඬුවම් දීමට ගත් දේ ම ඔවුන්ගේ විපතේ දී ඔවුන්ට ප්‍රයෝජනය විය.

මිසර වැසියන්ට පහර දීම

6-8 ඔබේ සතුරන්, ඔබේ සෙනඟගේ සිඟිත්තන් ඝාතනය කළ යුතු යයි නියෝග කළ විට, හැම දා පිටාර ගලන ඔවුන්ගේ ගංගාව ඔබ කැළඹෙන්නට සලස්වා, එය ලෙයින් දුගඳ හමන තැනක් කළ සේක. 
ඔබ ඔවුන්ගේ සතුරන්ට දඬුවම් කළ අයුරු ඔවුනට ම දක්වන පිණිස, පාළුකරයෙහිදී ඔබේ සෙනඟට පිපාසා වන්නට සැලැසූ සේක. 
ඉන්පසු, බලාපොරොත්තු රහිත ව සිටිය දී ම, ඔවුනට පමණටත් වැඩියෙන් ජලය දුන් සේක. 
9 ඔබේ දයාව පෙන්වන තරවටුවක් වැනි ඔවුන්ගේ දුක් කරදරවලින් ඔව්හු, උදහස් තීන්දුවලින් දඬුවම ගැන ඔබේ දයාව පෙන්වන තරවටුවක් වැනි ඔවුන්ගේ කරදරවලින්, ඉගෙනගත්හ.
10 පියෙකු දරුවන්ට දඬුවම් දෙන පරිදි ඔබ ඔවුන් පරික්ෂා කළ සේක. 
එහෙත්, දරුණු රජෙකු යටත් වැසියන් වරදට පත්කොට හෙළා දකින ලෙස ඔබ අනිත් අය දැඩි ලෙස විභාග කළ සේක. 
11 ඔව්හු දුර හො‍් ළඟ හො‍් සිටියාහු වෙත් වා, වෙහෙසට පත් වී සිටියෝ ය. 
12 ඔවුන් වෙළී සිටි වේදනාව දෙගුණයක් විය. 
අතීතය සිහි වන විට සුසුම්ලෑම දෙගුණ විය. 
13 ඔවුන්ට දඬුවම් දුන් දේ ම අනිත් අය ප්‍රීති ප්‍රමෝද කර වූ බව ඔවුන් ඇසූ විට ඔව්හු ඒ ක්‍රියා තුළ දෙවිඳුන් දුටහ. 
14 සියල්ල නිම වූ විට බොහෝ කලකට පෙර ඔවුන් පිටත දමා අනතුරට පාත්‍ර කොට ඉන්පසු ව සමච්චලයට ලක් කළ තැනැත්තා ගැන ඔව්හු මවිතයට පත් වූ හ.
ඔවුන් එසේ කළේ පිපාසය දැහැමියාට වඩා වෙනස් ලෙස ඔවුනට දැනුන බැවිනි.

මිසරය ගැන දෙවි සමිඳුන්ගේ ඉවසීම

15 බුද්ධි හීන නාගයන් සහ පිළිකුල් වන සතුන් නමදින පිණිස ඔවුන්ගේ මො‍්ඩ පවිටු සිතුවිලි ඔවුන් නොමඟ යැවූ බැවින් ඔවුන්ට දඬුවම් කරන පිණිස ඔබ බුද්ධි විරහිත සතුන් විශාල ගණනක් මවා 
16 පාපයේ උපකරණ පාපයට දෙන දඬුවම වන බව ඔවුන්ට ඉගැන්වූ සේක.
17-19 ඔවුන් පිට වග වලසුන් හා රුදුරු සිංහයන් එවීමට ද අලුතෙන් මවන ලද කෝපාවිෂ්ට වූ බිහිසුණු හුස්ම හෙළන, දුගඳ දුම් රොද පිට කරන නොඇසූවිරූ සතුන් හො‍් බියජනක ගිනි පුපුරු පිට කරන එක පහරකින් ඔවුන් නසා වනසාලීමටත් ඔවුන්ගේ බියකරු පෙනුමෙන් ම ඔවුන් වනසාලීමටත් සමත් සතුන් හො‍් එවීමට ද අනියත ද්‍රව්‍යයෙන් ලොව මැවූ ඔබේ හස්තය, එනම්, ඔබේ සව් බලැති හස්තය පමා නො වී ය. 
20 තවද, මොවුන් නොමැති ව පවා ඔබේ බලයේ හුස්මෙන් ගසාගෙන යනු ලැබ ඔබේ සාධාරණකමින් ලුහුබඳිනු ලැබ ඔබේ එක හුස්ම බිඳක බලයෙන් ඔවුන් මැරී වැටෙන්නට ඉඩ තිබිණි. 
ඔබ ගණන, මිම්ම, කිරුම, ඇතුව සියල්ල පිළියෙළ කළ සේක.

ඉවසීම විස්තර කිරීම

21 ඔබේ මහා සවිශක්තිය නිතර ඔබට අවනත ය. 
ඔබේ බාහු බලයට එරෙහි ව නැඟිටිය හැක්කේ කාට ද? 
22 ඔබ අබිමුව මුළු ලොව තරාදිය උස් පහත් කළ හැකි දූවිලි කුඩක් හා සමාන ය. 
පොළොවට වැටෙන උදය කාලයේ මීදුම් බිඳක් හා සමාන ය. 
23 එහෙත්, ඔබට සියල්ල කළ හැකි බැවින් ඔබ සියල්ලන් හට දයාන්විත ය. 
මිනිසුන් තම පව් ගැන පසුතැවී සිත් හරවා ගන්න පිණිස ඔබ ඔවුන්ගේ පාප ගැන නොසැලෙන්නෙහි ය. 
24 එසේ ය, මිහි මත ඇති සියල්ලට ඔබ ප්‍රේම කරන සේක. 
ඔබ විසින් සාදන ලද කිසිවක් ඔබ පිළිකුල් නොකරන සේක. 
මන්ද, ඔබ යමකට ද්වේෂ කළ සේක් නම්, ඔබට එය නොසාදන්න ඉඩ තිබිණි. 
25 ඔබට අභිමත නොවූ සේක් නම්, යමක් පවතින්නේ කෙසේ ද? 
ඔබ නොසෑදූ සේක් නම්, යමක් ආරක්ෂා වන්නේ කෙසේ ද? 
26 සමිඳුනි, ජීවමාන සියල්ලට ප්‍රේම කරන්නාණෙනි, සියල්ල ඔබ සතු බැවින් ඔබ සියල්ල ම ආරක්ෂා කරන සේක. 
සියල්ල තුළ ඔබේ අමරණීය ආධ්‍යාත්මය විනිවිද යයි.

 

– 12 වන පරිච්ඡේදය –

1 සමිඳුනි, වරද කරන්නන් ඔබ ක්‍රමක්‍රමයෙන් හරිගස්වන සේක. 
2 ඔබ කෙරෙහි විශ්වාසය තබා ඔවුන් නපුරෙන් ඈත් වනු පිණිස ඔවුන් වරද කළ සැටි ඔබ ඔවුන්ට පෙන්වා දී ඔවුන්ට අවවාද කරන සේක.

කානානිවරුන්ට දැක් වූ ඉවසීම

3 ඔබේ ශුද්ධ දේශයේ විසූ පැරණි දේශවාසීන්ට ඔබ ද්වේෂ කළ සේක. 
4 ඔවුන්ගේ පිළිකුල් සිරිත් විරිත් වලට ද ඔවුන්ගේ අනවින සහ මායාකර්ම අපිරිසිදු පිළිවෙත්වලට ද ඔබ ද්වේෂ කළ සේක. 
5 දරුදැරියන් මරාදමන කුරිරු මව්වරුන් නිසා ද, ලේ වගුළ යාගික මිථ්‍යා පිළිවෙත් මැද ඔවුන්ගේ සමාගමට ගත් අයවලුන් මිනිසුන්ගේ මස්මාංස කාදැමීම නිසා ද 
6 රැකවරණයක් නැති අය මරාදමන මිනීමරු දෙමාපියන් නිසා ද ඔබ ඔවුන්ට ද්වේෂ කළ සේක. 
7 අන් රටකට වඩා ඔබ ප්‍රේම කළ මේ රට ඊට සුදුසු දේවදරු ජනතාවක් ලබන පරිදි ඔබ අපේ පියවරුන් මඟින් ඔවුන් වනසාලීමට ඉටාගත් සේක. 
8 එහෙත්, ඔවුන් මිනිසුන් වූ බැවින් ඔබ ඔවුන් කෙරෙහි මෘදු ලෙස ක්‍රියා කළ සේක. 
ටිකෙන් ටික ඔවුන් වනසාලනු පිණිස ඔබේ සේනාවට කලින් යන දූතයන් මෙන් ඔබ බඹරුන් යැවූ සේක. 
9 ඔබ එසේ කෙළේ සටනක දී මේ අභක්තිකයන් දැහැමියන් හට පාවාදීමට නොහැකි වූ නිසා වත්, වග වලසුන් මඟින් හො‍් ඔබෙන් නික්ම ආ එක වචනයකින් හො‍් එක වර ඔවුන් වනසාලීමට බැරි වූ නිසා වත් නොවේ. 
10 ඔවුන් සහජයෙන් ම නපුරට ඇලී සිටින බව ද, ඇතුළාන්තයෙන් දුෂ්ට බව ද, ඔවුන්ගේ සිත් සතන් වෙනස් කළ නොහැකි බව ද, ඔබ මැනවින් දැන සිටි නමුත්, ඔවුන් හට පසුතැවී සිත් හරවා ගැනීමට ඉඩ ප්‍රස්ථා සලසා දෙමින්, ඔබ ඔවුන් කොටස් වශයෙන් හෙළාදැමූ සේක. 
11 මන්ද, ඔව්හු ආරම්භයේ සිට සාප ලත් ජාතියක් වූ හ.

ඉවසීම විස්තර කිරීම

ඔවුන්ගේ පාපවලට ඔබ ඔවුන්ට දඬුවම් නො දී සිටියේ කිසිවෙකුට බියෙන් නොවේ. 
12 ”ඔබ කුමක් කෙළෙහි දැ”යි කිව හැක්කේ කාට ද? 
ඔබේ තීරණයට විරුද්ධ වන්නේ කවරෙක් ද? 
ඔබ මවා වදාළ ජාතීන් විනාශ කිරීම ගැන ඔබට දොස් පවරන්නේ කවරෙක් ද? 
ඔබට විරුද්ධ ව අභියෝග කිරීමට ආව හැකි වරදකරුවන්ගේ ශූරයා කවරෙක් ද? 
13 ඔබ කිසි දාක අසාධාරණ ලෙස විනිශ්චය කෙළෙහි යයි ඔබ විසින් ම ඔප්පු කළ යුතු වූ ද, සියල්ල ගැන සලකන්නා වූ ද ඔබ හැර අන් දෙවි කෙනෙක් නැත. 
14 ඔබ දඬුවම් දුන් අය ගැන රජෙකු හො‍් සාහසික පාලකයෙකු හො‍් ඔබට දොස් පැවරීමට එනු නොහැකි ය. 
15 ඔබ සාධාරණ බැවින් ඔබ සාධාරණ ලෙස පාලනය කළ සේක. 
දඬුවම් නොලැබිය යුතු කෙනෙකු හෙළාදැකීම ඔබේ බලයට නුසුදුසු බව ඔබ සලකන සේක. 
16 ඔබේ යුක්තියේ මුල රඳා ඇත්තේ බලයෙහි ය. 
සියල්ලන් කෙරෙහි ආධිපත්‍යය ඔබට ඇති බැවින් ඔබ සියල්ලන්ට කාරුණික ය. 
17 ඔබේ අධිපති බලය ගැන ප්‍රශ්න කරන විට ඔබ තමන් ශක්තිය පෙන්වන සේක. 
මේ බව දන්න අයගේ අහංකාරය ඔබ අනාවරණය කරන සේක. 
18 එහෙත්, ඔබ තමන් බල මහිමය පාන විට විනිශ්චයේ දී මෘදු ය. 
ඔබ ඉතා කාරුණික ව අප පාලනය කරන සේක. 
මන්ද, ඔබ කැමැත්ත පෙන්වන විට ඔබේ බලය එහි ඇත්තේ ය.

දේව ඉවසීමෙන් පාඩමක්

19 ඔබ මෙසේ ක්‍රියා කිරීමෙන් දැහැමි මිනිසා සිය අසල්වැසියන්ට කෙසේ කාරුණික ව සිටිය යුතු දැ යි ඔබ තමන් සෙනඟට පාඩමක් උගන්වා ඇත. 
පාපයට පසු පසුතැවී සිත් හරවා ගැනීම ගැන මනා බලාපොරොත්තුවක් ඔබ තමන් දරුවන්ට දුන් සේක. 
20 ඔබේ දරුවන්ගේ සතුරන් මරණයට පත් කළ යුතු අවස්ථාවේ දී ඔවුන්ගේ දුෂ්ටකම ඉවත්කර ගැනීම සඳහා ඔබ දඬුවම් කළ යුතු අයට මෙතරම් සැලකිල්ලක් දක්වා සමාවක් දුන් සේක් නම්, 
21 ඔබ දිවුරුම් හා ගිවිසුම් මඟින් මෙතරම් යහපත් දේවල් පොරොන්දු වූ මුතුන්මිත්තන්ගේ දරුවන් ඔබ කොපමණ සැලකිලිමත් අවධානයක් සහිත ව විනිශ්චය නොකරන සේක් ද? 
22 මෙලෙස අප විනිශ්චය කරන විට ඔබේ කරුණා ගුණය ගැන කල්පනා කිරීමටත්, අප විනිශ්චය කරනු ලබන විට දයාව සොයා යාමටත් උගන්වනු පිණිස ඔබ අපට දඬුවම් දෙන විට අපේ සතුරන්ට දස දහස් ගුණයකින් වඩා දරුණු ලෙස ඔබ කස පහර දෙන සේක.

මිසරවැසි දඬුවම හා දේවානාවරණය

23 දුෂ්ට අධම ජීවිත ගත කරන අයට විරුද්ධ ව ඔවුන්ගේ ම පිළිකුල් ක්‍රියා මඟින් ඔවුන්ට දඬුවම් දීමට ඔබ සැලැසුවේ ඒ නිසා ය. 
24 සැබැවින් ම ඔව්හු මිනිසුන් නොමඟ යවන මාර්ගවලින් බොහෝ දුරට මංමුළා වී සිටියෝ ය. 
එබැවින් මො‍්ඩ කුඩා ළමුන් මෙන් රවටනු ලැබූ ඔව්හු ඉතා පිළිකුල් වූ හෙළාදැකිය යුතු සතුන් පවා දෙවිවරුන් මෙන් සැලකූ හ.
25 එබැවින් දැනුම් පැහැදුම් නැති දරුවන් වෙත දඬුවම් එවන පරිදි ඔවුන්ට සමච්චල් කරනු පිණිස ඔබ ඔවුන්ට දඬුවම් එවූ සේක. 
26 එහෙත් ඔව්හු එවැනි විහිළුකාර දඬුවම් නොතැකූ බැවින් දෙවියන් වහන්සේ විසින් එවිය යුතු සුදුසු දඬුවමක් විගස අත් දුටහ. 
27 ඔවුන් දෙවිවරුන් මෙන් සැලකූ ඒ සතුන්ගෙන් ම පීඩා විඳ ඔව්හු වෙහෙසට පත් වූ හ. 
ඒ සතුන් මඟින් ම ඔවුන් දඬුවම් ලැබූ විට ඔව්හු සත්‍ය වූ දෙවිඳුන් කෙළින් ම දැක එතුමාණන් පිළිගත්හ. 
එහෙත්, මෙතෙක් කල් ඔව්හු එතුමාණන් ගැන දැනගැනීම ප්‍රතික්ෂේප කර සිටියෝ ය. 
ඔවුන්ට දරුණු දඬුවම් පැමිණියේ ඒ නිසා ම ය.

 

– 13 වන පරිච්ඡේදය –

ආකාශ වස්තූන් සහ සොබා දහම පිදීම

1 දෙවිඳුන් නාඳුනන සියලු මනුෂ්‍යයෝ සැබැවින් ම මො‍්ඩයෝ ය. 
එවැනි අය දැක්ක හැකි දේවලින් ස්වයම්භූ තැනැන් වහන්සේ නොදකින්නො‍් ය. 
සොයන්නට නොහැකි වූ එතුමාණන්ගේ නිර්මාණයන් හදාරන නමුත්, ඔව්හු නිර්මාතෘවරයාණන් නොහඳුනන්නො‍් ය.
2 ලොව පාලනය කරන දෙවිවරුන් මෙන් ඔවුන් සලකා ඇත්තේ ගින්න ය, සුළඟ ය, කුණාටුව ය, තාරකා මණ්ඩල ය, වේගවත් ජලය ය. 
එසේත් නැතිනම් අහසේ ප්‍රදීපයෝ ය. 
3 ඒවායේ ශෝභමානත්වයෙන් වසඟ වී ඔවුන් ඒවා දෙවිවරුන් මෙන් සලකා තිබේ නම්, ශෝභනත්වයේ කර්තෘවරයාණන් ඒවා මවා ඇති බැවින් ඒ සමිඳාණෝ ඒවා කෙසේ අබිබවා යන සේක් දැ යි මිනිස්සු තේරුම්ගනිත් වා!
4 ඒවායේ බලවේගයෙන් ඔව්හු විස්මිත වී සිටින්නො‍් නම්, ඒවා මැවූ තැනැන් වහන්සේ කොපමණ බලවත් දැ යි නිගමනයට බසිත් වා! 
5 මන්ද, මැවිල්ලේ තේජස හා ශෝභනත්වය සසඳා ඒවායේ කර්තෘවරයාණන් ගැන කල්පනා කළ හැකි ය. 
6 එහෙත් මොවුන්ට එතරම් දොස් පැවරිය නොහැකි ය. 
මන්ද, ඔව්හු වනාහි දෙවිඳුන් සොයා යාමෙන් සහ එතුමාණන් සොයාගැනීම පිළිබඳ දැඩි ආශාවෙන් මංමුළා වී ගොස් ඇත්තෝ පමණෙකි. 
7 එතුමාණන්ගේ ක්‍රියාවන් අතර ජීවත් වෙමින් මේ ක්‍රියා තේරුම්ගැනීමට වෑයම් කරමින් මෙපමණ ශෝභනත්වයක් දැක පෙනුමෙන් රැවටී, ඔව්හු එයට ගොදුරු වෙති. 
8 එහෙත්, ඔවුන්ට පවා කමා කළ යුතු නැත. 
9 ලෝකය නිරීක්ෂණය කිරීමට හැකි වන පරිදි මෙතරම් නැණ නුවණ ලබාගන්නට පුළුවන් නම්, ඔවුන් එහි ස්වාමීන් සොයාගැන්මට පමා වූයේ කෙලෙස ද?

පිළිමවලට වැඳීම

10 එහෙත්, මියගිය දේවල් කෙරෙහි බලාපොරොත්තු තැබුවා වූ මිනිසාගේ අත්කම්වලට ද, සියුම් ලෙස නිම වන ලද රන් රිදී කලා කෘතීන්ට ද සතුන්ගේ ස්වරූපයන්ට ද, දුරාතීතයේ දී නෙළන ලද නිෂ්ඵල ගල් කැටයම්වලට ද ”දේව” යන නාමය දුන් ඔව්හු කාලකණ්ණියෝ ය. 
11 ලී වඩුවෙකු ගැන සිතන්න; 
ඔහු කදිම ගසක් කපයි; 
සීරුවෙන් පොත්ත සැසදමා, විස්මයජනක ප්‍රවීණතාවකින් දිනපතා දිවියට වැඩදායක භාණ්ඩයක් ඔහු එම ගසින් නෙළාගනියි. 
12 ඉතිරි වන කෑලි ස්වල්පය ගෙන ආහාර පිස, ඔහු එම ආහාර අනුභව කරයි. 
13 තවත් නිෂ්ඵල කොටසක් ඉතිරි වී ඇත. 
එය ගැට සහිත පුරුක් කොටසකි. 
ඔහු එය රැගෙන විවේක වේලාවක අවධානය යොදා, ටිකින් ටික කලාත්මක ලෙස එහි කැටයම් කොටා මිනිස් රුවක් එයින් නිමවයි. 
14 එසේත් නැත්නම්, එහි හිරියල් තවරා, රතු පාට ගා, කැළැල් මකා, එයින් පිළිකුල් කටයුතු සතෙකු සාදයි. 
15 ඉන්පසු ඔහු එයට නිසි නිවහනක් තනමින් යකඩ ඇණයකින් බිත්තියට සවිකර තබයි. 
16 මෙලෙස එය බිමට නොවැටෙන ලෙස වගබලාගත් පසු, ඊට කිසිත් කළ නොහැකි බව ඔහු හොඳින් දනියි. 
එය පිළිමයක් පමණ ය, ඊට ආධාරය ඇවැසි ය. 
17 එහෙත් ඔහු වස්තුව, විවාහය, දරු සම්පත සඳහා යාච්ඤා කිරීමට කැමැති වන විට මේ අප්‍රාණික භාණ්ඩයට හඬනඟා කතා කිරීමට ලජ්ජා නොවන්නේ ය. 
ශරීර සනීපය ලබාගැනීමට ඔහු යදින්නේ දුබලයෙකුට ය. 
18 ජීවිතය රැකගැනීමට ඔහු පිහිට පතන්නේ මැරී ඇති දෙයකිනි. 
ආධාරය පතා ඔහු යන්නේ කොහෙත්ම අත්දැකීමක් නැති තැනැත්තෙකු ළඟට ය. 
ගමන් යාම සඳහා ඔහු පිහිට පතන්නේ පාදයක් වත් සෙලවීමට බැරි කෙනෙකුගෙන් ය. 
19 ඔහුගේ ලාභය සඳහා ද, සැලසුම් හා සිය ශිල්පය මඟින් සඵලත්වය ලබාගැනීම සඳහා ද ඔහු දක්ෂතාව සොයන්නේ කිසි ම දක්ෂකමක් නැති අත්වලින් ය.

 

– 14 වන පරිච්ඡේදය –

නිෂ්ඵල නිර්මාණ

1 තවත් කෙනෙක් චණ්ඩ මුහුද හරහා නැවකින් යාත්‍රා කිරීම සඳහා ඔහු සිටින නෞකාවටත් වඩා දුබල ලී කොටයකින් පිහිට පතයි. 
2 නැවක් වූ කලී ලාභ ලැබීමේ ආශාවෙන් නිපදවන ලද්දක් බව නිරනුමාන ය. 
නාවික ශිල්පියාගේ ප්‍රඥාව එය සෑදීමේ ගැබ් වී ඇත. 
3 එහෙත් පියාණෙනි, සමුදුර හරහා මඟක් පාදාගෙන රළ පතර උඩින් සුරැකි මඟක් පිළියෙළ කොට එය මෙහෙයවනු ලබන්නේ ඔබේ පරිපාලනය විසිනි. 
4 මෙලෙස ඊට කුමක් වුවත්, ඔබට එය ගැළවිය හැකි බව ඔබ වහන්සේ පෙන්වන සේක. 
එබැවින් දක්ෂකමක් නැති කෙනෙකුට පවා පිටරටකට යාත්‍රාකළ හැකි ය. 
5 ඔබේ ප්‍රඥාවෙන් කළ ක්‍රියා නිෂ්ඵල ව තිබීම ඔබේ අභිමතය නොවේ. 
එබැවින් මිනිසා කුඩා ලී කොටයක් කෙරෙහි විශ්වාසය තබා, එවැනි ලී පහුරක් මඟින් සමුදුර තරණය කොට සුරැකි ව වරායට එයි.
6 එසේ ය, ආරම්භයේ දී පවා උඩඟු යෝධයන් නසින විට ලෝකයේ බලාපොරොත්තුවට සරණ වූයේ ලී පහුරකි. 
ඔබේ හස්තයෙන් එය මෙහෙයවනු ලැබ මතු කාලය සඳහා නව පරපුරක ඇරැයුම එයින් රැකුණේ ය. 
7 දැහැමිකමට ඉවහල් වන ලී කොටය ආසිරි ලද්දකි. 
8 එහෙත් විනාශ වී යන හස්ත කර්මාන්තයකට දෙවියන් යන නම තබා ඇති බැවින් ඒ කර්මාන්තයත් එය නිමැ වූ ශිල්පියාත් සාප ලද්දෝ ය. 
9 එසේ ය, දෙවිඳාණෝ අභක්තිකයාටත් ඔහුගේ අභක්තික කර්මාන්තයටත් ද්වේශ කරන සේක. 
10 කර්මාන්තයත් ශිල්පියාත් එක ලෙස වනසනු ඇත. 
11 එබැවින් විජාතීන්ගේ පිළිම මත විනාශය පහළ වනු ඇත. 
මන්ද, ඒවා දේව මැවිල්ලේ කොටසක් වුව ද, ඒවා පිළිකුල් වී තිබේ; 
මිනිසුන්ට මලපතක් වී ඇත; 
අනුවණ අයගේ පාදවලට බොරු වළක් වී ඇත.

පිළිම වැඳීමේ ආරම්භය

12 පිළිම සෑදීම අශීලාචාරකමේ මුල වේ. 
ඒවා සොයාගැනීම ජීවිතය දූෂණය කිරීම වේ. 
13 ආරම්භයේ දී ඒවා තිබුණේ නැත. 
සදහට ම තිබෙන්නේත් නැත. 
14 ඒවා ලෝකයට පැමිණියේ මිනිසාගේ බොරු අහංකාරයෙන් ය.
එබැවින් ඒවාට හදිසි අවසානයක් සූදානම් කර ඇත. 
15 පියෙක් අකාලේ දුකට පත් වී හදිසියෙන් මියගිය සිය දරුවාගේ රූපයක් සාදයි. 
ඉන්පසු ඔහු ඊයේ මළකඳක් වූ ඒ රූපයට දෙවියෙකු මෙන් ගරු කොට ඔහුගෙන් යැපෙන්නන්ට ද, එම රහස් පිළිවෙත් උගන්වයි. 
16 කලක් ගිය පසු, ඒ අභක්තික සිරිත මුල් බැස නීතියක් මෙන් පිළිපදිනු ලැබේ. 
17 ඉන්පසු රාජ කුමරුවන්ගේ අණ ප්‍රකාර ඒ නෙළූ පිළිම වන්දනාමාන ලබයි. 
රජවරු ඈත ප්‍රදේශවල විසූ බැවින් ඔවුන් ඉදිරියේ ගෞරව ප්‍රණාමය කිරීමට මිනිසාට නොහැකි වේ. 
එවිට ඔහු ඔවුන්ට ගරුසම්මාන පුදන පිණිස රජවරුන්ගේ දෘශ්‍යමාන පිළිරූ නිපදවති. 
එවැනි උද්‍යෝගයකින් ඔවුන් හඟින්නේ ඔවුන් අතර නැති අය ගැන තමන් අතර ඇති අය මෙන් පාරට්ටු කිරීම යි.
18 මෙලෙස කලා ශිල්පියාගේ හැඟීම් මාත්‍රය නිසා එවැනි රජෙකු නොදත් අය පවා ඔවුන්ගේ වත්පිළිවෙත් පතුරුවා හැරීමට පොළඹවන ලදහ. 
19 කලා ශිල්පි වූකලී සිය පාලකයා සතුටු කිරීමේ චේතනාවෙන් රජුගේ යථා ස්වරූපයටත් වඩා හොඳින් ඔහුගේ පිළිමය නිම කිරීමට සිය කලා ශක්තිය යෙදී ය. 
20 සෙනඟ ද, කලා කෘතියේ ශෝභනත්වයට වසඟ වී මිනිසෙකු වශයෙන් මෙතෙක් කල් ගරු කළ තැනැත්තාට දෙවියෙකු වශයෙන් ගරු කරන්ට පටන්ගත් හ. 
21 මෙලෙස සෙනඟ කාලකණ්ණිකමට හො‍් රාජකීය බලයට හො‍් වහලුන් වී ගල්වලට සහ ලී මුගුරුවලට අසමසම දේව නාමය පැවැරීම ඔවුන්ගේ ජීවිතයට මලපතක් විය.

රූප වන්දනාවේ ප්‍රතිවිපාක

22 දෙවිඳුන් පිළිබඳ වැරදි දැනීමෙන් පමණක් සෙනඟ වරදට පත් වීමටත් වඩා දෙයක් සිදු විය. 
එනම්, අනුවණකමට ලක් වූ ඔවුන්ගේ මහා ජීවිත සටනේ දී ඔව්හු මෙවැනි මහා විනාශකාරී දේවලට ‘සාමය’ යන නාමය තැබූ හ. 
23 මෙලෙස ඔව්හු තමන්ගේ දරුවන් ඝාතනය කරන ඇපවීම්වල දී ද, ගුප්ත අබිරහස්වල දී ද, අශීලාචාර වත්පිළිවෙත් සහිත කාමො‍්ත්සව වල දී ද, 
24 කෙනෙක් තව කෙනෙකු ද්‍රෝහි ලෙස මරාදැමීමෙන් හො‍් පරදාර සේවනයෙහි යෙදී නපුර කරමින් හො‍් ඔවුන්ගේ පෞද්ගලික ජීවිතය හො‍් විවාහ ජීවිතය හො‍් පිරිසිදු ලෙස රැක නොගත්තෝ ය. 
25 සැම තැන ම ඇත්තේ ලේ වැගිරීම් සහ මිනීමැරීම් රැසක් ය; 
සොරකම් සහ වංචාකම් ය; 
දූෂණ ය; 
ද්‍රෝහිකම් ය; 
කැරලි ය; 
බොරු දිවුරීම් ය; 
26 ශිෂ්ට මිනිසුන් අවුල් කිරීම ය;
ලබාගත් ප්‍රයෝජන අමතක කිරීම ය; 
මිනිසුන් දූෂ්‍ය කිරීම ය; 
සොබා දහමට විරුද්ධ ව පව් කිරීම ය; 
කැඩුණු විවාහ ය; 
පරදාර සේවනය ය; 
කාමො‍්ත්සව ය. 
27 නිර්නාමික පිළිම වැඳීම සැම නපුරේ ම මුල වේ;
හේතුව වේ; 
අවසානය වේ. 
28 ඔව්හු එක්කෝ උමතු වන තුරු ප්‍රීති වෙති.
එසේ නොමැති නම්, ව්‍යාජ ලෙස දිවැසි වැකි දොඩති. 
නැතහොත් අසාධාරණ ලෙස කල් යවති. 
එසේත් නොමැති නම්, වැරදි ලෙස දිවුරුම් දෙති. 
29 අප්‍රාණික පිළිම කෙරෙහි ඔවුන් තමන් විශ්වාසය තබන බැවින් ඔවුන්ගේ බොරු දිවුරුම්වලින් ඔවුන්ට නපුරක් වන බව ඔව්හු නොසලකති.
30 එහෙත්, හේතු දෙකක් පිට සාධාරණකම ඔවුන්ට දඬුවම් දෙනු ඇත. 
දෙවිඳුන් පිළිබඳ සංකල්පය හෙළාදුටු නිසා රූප වන්දනාකරුවන් වශයෙන් ද ශුද්ධ වූ සියල්ලට එරෙහි ව යමින් සත්‍යයට විරුද්ධ ව දිවුරන රැවටිලිකරුවන් වශයෙන් ද ඒ දඬුවම් ඔවුන්ට ලැබෙනු ඇත. 
31 මන්ද, වරදකරුවන් හට දඬුවම් ලැබෙන්නේ මිනිසුන් දිවුරීමට භාවිත කරන දේවල බලයෙන් නොව පවිටුවන්ට නියම වූ පල විපාක අනුව ය.

 

– 15 වන පරිච්ඡේදය –

ඉශ්රායෙල්වරුන් රූප වන්දනාකරුවන් නොවීම

1 අපේ දෙවියන් වහන්ස, ඔබ කාරුණික ය; 
පක්ෂපාත ය; 
වහා නොකිපෙනසුලු ය. 
ඔබ දයාන්විත ව සියල්ල පාලනය කරන සේක.
2 අප පව් කරන විට පවා ඔබේ බලය පිළිගන්න බැවින් අපි ඔබට අයිති වෙමු.
එහෙත්, අපි ඔබට අයිති ය කියා ඔබ පිළිගන්නා බව දන්නා බැවින් අපි පව් නොකරමු. 
3 සැබැවින් ම සැබෑ දැහැමිකම නම් ඔබ පිළිගැනීම ය. 
ඔබ බල මහිමය දැනගැනීම අමරණීය භාවයේ මුල ය. 
4 දූෂ්‍ය වූ මිනිස් කලා කෘතියක් වත්, සිත්තරෙකුගේ පලක් නැති ශ්‍රමයක් වත්, 
5 පෙනුමෙන් අනුවණයන් වශී කරවන වෛවර්ණ පාට ගාන ලද රූපයකින් වත් හො‍් හුස්ම නොහෙළන අප්‍රාණික රූපයකට ආශා කිරීමෙන් වත් හො‍් අපි නොමඟ නොගියෙමු.
6 ඒවා සාදන්නො‍් ද, ඒවාට ගරු කරන්නො‍් ද, ඒවා නමදින්නො‍් ද ඒවායේ නපුරට ප්‍රේම කරන්නො‍් ය. 
ඒවා කෙරෙහි බලාපොරොත්තු තැබීමට සුදුස්සෝ ය.

පිළිම සාදන්නො‍් අනුවණයෝ ය

7 පොළොවේ මැටි ගෙන, වෙහෙස මහන්සි වී අපේ භාවිතය සඳහා විවිධ දේ හැඩගස්වන කුඹල්කරුවකු ගැන සිතා බලන්න. 
එක ම පසින්, ඔහු පවිත්‍ර දේවල් සඳහා ද අපවිත්‍ර දේවල් සඳහා ද, එක සේ ම බඳුන් සාදන්නේ ය. 
එ දෙවර්ගයේ ම බඳුන්වලින් කුමන ඒවා ඒ ඒ පාවිච්චියට ගන්නේ ද යන්න තීරණය කිරීම කුඹල්කරු සතු ය. 
8 මෙලෙස ඔහු ඒ මැටියෙන් ම, වැඩක් නැති දේව රූපයක් සඳහා නිකරුනේ තම ශ්‍රමය යොදයි. 
ටික කලකට පෙර පසින් තනන ලද ඔහු, තමන් ණයට ලැබූ ජීවිතය ගැන ගණන් දීමට කැඳවනු ලබන විට ඒ පසට ම විගස හැරී යනු ඇත. 
9 තවද, ඔහු ඉක්මනට එන මරණය ගැන වත්, කෙටි ආයුෂ ගැන වත් කල්පනා නොකරයි. 
මෙසේ කල්පනා නොකරනු පමණක් නොව, ඔහු රන් කරුවන් හා රිදී කරුවන් අබිබවයි. ලෝකුරුවන් ද අනුගමනය කරයි.
ඔහු තමා සාදන ව්‍යාජ පිළිම ගැන උදම් අනයි. 
10 ඔහුගේ සිත අළු හා සමාන ය; 
ඔහුගේ බලාපොරොත්තුව කුණු කසළටත් වඩා පහත් ය.
ඔහුට ක්‍රියාශීලි ආත්මයක් දී ඔහු ජීවමාන ලෙස පණගැන් වූ 
11 තමා මැවූ තැනැන් වහන්සේ වැරදි ලෙස තේරුම්ගත් නිසාත් ඔහුගේ ජීවය මැටි පසටත් වඩා නීච ය. 
12 තවත් කිව යුතු දෙයක් වේ; 
ඔහු මේ ජීවිතය සෙල්ලමක් ලෙස සලකයි; 
මිහි පිට තමාට ලැබෙන කාලය ලාබෙට බඩු ගත හැකි වෙළෙඳ පොළක් මෙන් සලකයි. 
”කොතරම් නින්දිත මාර්ගයකින් වේවා, මිනිසෙක් තම දිවි පෙවෙත ලබාගත යුතු”යි කියා ඔහු පවසයි. 
13 පොළොවේ එක ම පසින් කැඩෙන සුලු භාජන සහ පිළිම සාදන මොහු අන් හැමට ම වඩා හොඳින් තමා පව් කරන බව දනියි.

මිසරවාසීන්ගේ උමතුව

14 කුඩා ළමුන්ට දක්වනවාටත් වඩා අනුකම්පා දැක්විය යුතු ඉතාමත් ම අනුවණ අය නම්, ඔබේ සෙනඟ වරක් සැහැසි ලෙස පාලනය කළ සතුරො‍් ය. 
15 මන්ද, ඔව්හු, ඇස් තිබුණත් නොපෙනෙන, කන් තිබුණත් නෑසෙන, නාස් තිබුණත් හුස්ම නොගන්න, අත් ඇඟිලි තිබුණත් පාවිච්චි නොකරන විජාතීන්ගේ පිළිම දෙවිවරුන් මෙන් සැලකූ හ. 
ඔවුන්ට පාද තිබුණත් ඔව්හු ගමන් නොකරති. 
16 මනුෂ්‍යයෙකු ඔවුන් සෑදූ නිසා ඔවුන් හැඩගැස්වූයේ හුස්ම ණයට ලබාගත් මැවිල්ලක් විසිනි.
කිසිම මිනිසෙකුට තමා වැනි දෙවියෙකු හැඩගැස්වීම නුපුළුවන. 
17 ඔහු මැරෙනසුලු බැවින් ඔහුගේ අධාර්මික අත්වලින් නිපදවිය හැක්කේ මළ දෙයක් පමණ ය.
ඔහුගෙන් වන්දනාමාන ලබන දේවලට වඩා ඔහු අගනේ ය. 
ඔහුට අඩු වශයෙන් ජීවත් වීමේ හැකියාව වත් තිබුණේ ය. 
එහෙත්, ඒවාට නම්, එවැන්නක් නොතිබුණේ ය. 
18 සෙසු දේවලටත් වඩා ඉතාමත් ම අනුවණ වූ ලෙස, බොහෝ සේ ද්වේෂ කටයුතු සතුන්ට පවා වන්දනා කරනු ලැබේ.
19 මේ සතුන් හට සමහර සතුන්ට තිබෙන ලෙස වන්දනාවට මිනිසා වශී කරන යම් කිසි ශෝභනත්වයක් නැති වුවත් දේව ප්‍රශංසාව හා ආසිරි කෙරෙන් ඔවුහු බැහැර ව සිටිති.

 

– 16 වන පරිච්ඡේදය –

මිසරය සහ ඉශ්රායෙලය

1 මිසර වාසීහු නිසි ලෙස ද්වේෂ කටයුතු සතුන්ගෙන් දඬුවම් ලැබූ හ. 
වන සතුන් විශාල ගණනකින් පීඩා කරනු ලැබූ හ. 
2 මේ දඬුවම්වලට හාත්පසින් ම වෙනස් අන්දමකට ඔබේ සෙනඟට ඔබ කාරුණික ව ක්‍රියා කළ සේක.
ඔවුන්ගේ දැඩි සාගින්න නිවීමට කලාතුරකින් ලැබෙන ප්‍රණීත ආහාරයක් වන පක්ෂීන් ඔබ ඔවුන් අතට සපයා දුන් සේක. 
3 එහෙත්, මිසර වාසීන්ට නම්, ඔවුන්ට විරුද්ධ ව එවන ලද පිළිකුල් සතුන් දුටු විට ඔවුන් සාගින්නෙන් සිටි නමුත්, ඒ ස්වාභාවික සාගින්න පවා නැති විය.
තවද, ඔබේ සෙනඟ ටික කලක් ආහාර නොලැබ සිටි නමුත් පසු ව ඔවුන්ගේ කොටස වශයෙන් කලාතුරකින් ලැබෙන ප්‍රණීත ආහාර ඔව්හු ලැබූ හ. 
4 පීඩා කළ අය ම පීඩාවට පත් වීම අනිවාර්ය දෙයක් ව තිබුණි. 
ඒ සිය සතුරන්ට දඬුවම් ලැබීම ඉශ්රායෙල්වරුන්ට පෙනෙන ලෙසයි.

වසංගත පැමිණීම

5 වන සතුන්ගේ දරුණු කෝපයට මිසර වාසීන් පාත්‍ර වී ඇඹරි ඇඹරී සිටි සර්පයන්ගේ දෂ්ට කිරීමෙන් ඔවුන් මියයන විට ඔබේ උදහස අවසානය දක්වා නොපැවතුණේ ය. 
6 ඔවුන් දුකට පත් වූයේ කලකට පමණක් තිබූ තරවටුවක් නිසා ය. 
මන්ද, ඔබේ නීතිය පිළිබඳ අණපණත් ඔවුන් සිහිගැන්වීමට ඔවුන්ට විමුක්තිදායක සංකේතයක් තිබිණි.
7 ඒ සංකේතය දෙස හැරුණු සැම කෙනෙක් ම ගැළවීම ලැබූ හ. 
එසේ වූයේ සංකේතය නිසා නොව පොදු ගැළවුම්කාරයාණන් වන ඔබ මඟිනි. 
8 සැම නපුරකින් ම මිදීම දෙන්නේ ඔබ බව එවැනි මාර්ගවලින් ඔබ අපේ සතුරන්ට ඔප්පු කළ සේක.
9 තවද, පළඟැටියන්ගේ සහ මැස්සන්ගේ දෂ්ට කිරීම් විනාශදායක වූ බැවින් ද ඔවුන් සුවපත් කිරීමට පිළියමක් සොයාගත නොහැකි වූ බැවින් ද එවැනි සතුන් ලවා ඔවුන්ට දඬුවම් කිරීම ඉතා සුදුසු විය.
10 එහෙත්, විෂඝෝර සර්පයන්ගේ දෂ්ට කිරීමෙන් පවා ඔබේ පුත්‍රයෝ විනාශ නොවූ හ. 
ඔබේ දයාවෙන් ඔබ ඔවුන්ට සහය වී ඔවුන් සුව කළ සේක. 
11 වරක් දෂ්ට කිරීමෙන් පවා ඔව්හු කොපමණ විගසින් සුවය ලැබුවෝ ද! 
ඔබ මෙසේ කෙළේ ඔවුන් ඔබ තරයේ අමතක නොකරන පිණිසත් ඔබේ දයාවෙන් ඔබ ඔවුන් අහක නොදමන පිණිසත් ඔවුන්ට ඔබේ වදන් සිහි කිරීමක් වන පිණිසත් ය.
12 සමිඳුනි, ඔවුන් සුවපත් වූයේ බෙහෙත් පැළයකින් නොවේ, බෙහෙත් පැලැස්තරයක් දැමීමෙන්වත් නොවේ. 
සියල්ල සුවපත් කරන ඔබේ ම වචනයේ බලයෙන් ය. 
13 ඔබට ජීවිතය කෙරෙහිත්, මරණය කෙරෙහිත් බලය ඇත. 
ඔබ, මිනිසුන් පාතාල ලෝකයේ දොරටුවට ගෙන යන සේක; 
එතැනින් ආපසු ගෙන එන සේක. 
14 මිනිසෙකුට තම දුෂ්ටකමින් අන් කෙනෙකු මරන්නට පුළුවන.
එහෙත්, ඔහු චුත ව ගිය ජීව හුස්ම ආපසු නොගෙනෙයි, පාතාල ලෝකයට ගිය ප්‍රාණයට යළි නිදහස නොදෙයි.

සොබා දහමේ බලතාවයෝ

15 ඔබේ හස්තයෙන් ගැළවෙන්නට නුපුළුවන. 
16 ඔබ තුමන් පිළිගැනීම ප්‍රතික්ෂේප කළා වූ අභක්තිකයෝ ඔබේ හස්තයේ බලයෙන් කස පහර වින්දෝ ය. 
තද වර්ෂාවකින් ද, ගල් වර්ෂාවකින් ද, මහා ධාරානිපාත වර්ෂාවලින් ද ලුහුබඳිනු ලැබ, ඔව්හු ගිනිබත් වූ හ. 
17 වඩාත් පුදුම දෙය නම්, ජලය ගින්න නිවාදමයි. 
එහෙත් ඒ ගින්න ජලය මැද පෙර නුවු විරූ ලෙස ඇවිළී යන්න විය. 
මන්ද, සොබා දහම පවා සටන් කරන්නේ දැහැමි අය උදෙසා ය. 
18 එක අවස්ථාවක දී අභක්තිකයන්ට විරුද්ධ ව එවන ලද ගින්නෙන් උන් නොදැවී යන පිණිසත්, එවැනි දර්ශනයකින් දේව තීන්දුව ඔවුන් ලුහුබැඳ යන බව, ඔවුන්ට පැහැදිලි කරන පිණිසත්, ගිනි ජාලාව නිවී ගියේ ය. 
19 තවත් අවස්ථාවක දී වරදට පත් වූ දේශයක අස්වැන්න විනාශ කරනු පිණිස ජලය මධ්‍යයේ ම පවා ඒ ගින්න සාමාන්‍ය ගින්නකට වැඩියෙන් ඉතා දරුණු ලෙස ඇවිලෙන්නට විය. 
20 එහෙත්, ඔබේ සෙනඟට ඔබ ක්‍රියා කෙළේ කොපමණ වෙනස් අයුරින් ද? 
ඔබ ඔවුන්ට සුර දූතයන්ගේ ආහාර දුන් සේක. 
සැම මිහිරි බව අඩංගු සැම ආශාවන් සංසිඳුවන, කල්තියා සූදානම් කරන ලද පූප සගලොවින් ඔබ නොකඩවා ඔවුන්ට එවූ සේක. 
21 ඔබ එවූ ආහාරය මඟින් ඔබ තමන් දරුවන් කෙරෙහි දක්වන ප්‍රසන්න භාවය පෙන් වූ සේක. 
මන්ද, එය අනුභව කළ සැම දෙනාගේ ම ආශාවට ගැළපෙනසුලු විය. 
යමෙකු අනුභව කරන්නට කැමැති වූ දෙය බවට එය ඉබේ ම හැරුණේ ය. 
22 හිම සහ හිම කැට ගින්නෙන් දිය වී නොගියේ ය. 
ඔවුන්ගේ සතුරන්ගේ අස්වැන්න වනසනු පිණිස ගල් වර්ෂාව මැද පවා ගින්න දවාලන බවත්, වහින වැස්ස මැද පවා ගින්න ඇවිලෙන බවත් ඔවුන්ට දන්වන ලද්දේ ය. 
23 එහෙත්, අනික් අතට දැහැමියා හට ආහාර සැපයීමේ දී ගින්නට එහි ස්වාභාවික ගුණය පවා අමතක වනු ඇත්තේ ය. 
24 මැවිල්ලේ කර්තෘවරයාණන් වන ඔබට කීකරු වෙමින් දුදනන් හට දඬුවම් දීමට මැවිල්ල යුහුසුළු වෙයි. 
ඔබ අදහන අයගේ යහපත තකා එය සිය ක්‍රියාකාරිත්වය මෘදු කරයි. 
25 මෙලෙස මැවිල්ල සම්පූර්ණයෙන් ම වෙනස් වීම සව් සත පෝෂ්‍ය කරන ඔබගේ බහුලත්වය අරබයා සිදු වූයේ, අගහිඟ ඇති අයගේ අවශ්‍යතාවන්ට සරිලන පරිදි ය. 
26 සමිඳුනි, ඔබ එය සිදු කළේ මිනිසා පෝෂණය වන්නේ විවිධ අස්වැන්නෙන් නොවන බවත්, ඔබ අදහන සියල්ලන් ආරක්ෂා කරන ඔබේ වචනයෙන් බවත් ඔබේ ප්‍රේමාන්විත දරුවන් ඉගෙනගන්නා පිණිස ය. 
27 ගින්නෙන් විනාශ කරදැමීමට නොහැකි වූ දෙය එක හිරු රශ්මි ධාරාවක උණුසුමෙන් දිය වී ගියේ ය. 
28 මෙයින් ඔබ අපට උගන්වන්නේ අප ඔබට තුති දීමට ඉරු උදා වීමට කලින් අවදි විය යුතු බවත්, අරුණාලෝකය වැටෙන විට අප ඔබට යාච්ඤා කළ යුතු බවත් ය. 
29 මන්ද, කළගුණ නොදක්වන්නන්ගේ බලාපොරොත්තුව ශීත කාලයේ තුෂාරය මෙන් දිය වී යනු ඇත. 
නිකරුණේ ගලා යන වතුර මෙන් ගලා යනු ඇත.

 

– 17 වන පරිච්ඡේදය –

මිසරයට අඳුර

1 ඔබේ විනිශ්චයයෝ සැබැවින් ම ශ්‍රේෂ්ඨ ය, වචනයෙන් විස්තර කළ නොහැකි ය. 
සැබෑ අවබෝධය නොලද අය මංමුළා වී ගොස් ඇත්තේ එබැවින් ය. 
2 ශුද්ධ ජාතිය තමන්ගේ බලයට යටත් ව සිටින්නේ ය යි දුදනන් සිතූ විට ඔව්හු අඳුරෙහි සිරකරුවන් මෙන් ගැලී සිටියෝ ය; 
දීර්ඝ රාත්‍රියෙහි ම සිර විලංගුවල සිටියෝ ය. 
තමන්ගේ ම පියසි යට සදාතන පරිපාලනයෙන් නෙරපනු ලැබ සිටියෝ ය.
3 ඔවුන්ගේ රහස් පව් සමඟ ම කාහටත් නොදැනුවත් ව ඔව්හු හොඳට ම අමතක කරනු ලැබූහ යි ඔවුන් සිතූ විට විස්මයජනක ලෙස අවුල් වියවුල් ව දර්ශනවලින් බියට පත් වී ඔව්හු විසුරුවාදමනු ලැබූ හ. 
4 ඔවුන් සැඟවී සිටි ස්ථානය පවා ඔවුන්ගේ බිය දුරු කිරීමට අසමත් ය. 
ඔවුන් සිසාරා බියගන්වන හඬ ශබ්ද ද රැව් පිළිරැව් දුන්නේ ය. 
අඳුරු රුදුරු මුහුණු සහිත අවතාර ඔවුන්ට හොල්මන් කෙළේ ය. 
5 කිසි ම ගින්නකින් වත් ඔවුන්ට සෑහෙන පමණ එළිය නොලැබිණි. 
දීප්තිමත් බැබළුණු තරුවලට පවා ඒ බියජනක රාත්‍රිය ආලෝකවත් කිරීමට නුපුළුවන් විය. 
6 දරුණු ලෙස බියගන්වන ඉබේ ම ඇවුළුණු ගිනි මැලයක් ඔවුන් ආලෝක කෙළේ ය. 
වරක් ඒ දර්ශනය අතුරුදහන් වූ විට ඔවුන් භීතියට පත් වී කිසි දාක ඊට වඩා භයානක දෙයක් නොදැක්කෝ යයි ඔව්හු සිතූ හ. 
7 ඔවුන්ගේ ඉන්ද්‍රජාල සහමුලින් ම නිෂ්ඵල විය. 
ඔවුන් පාරට්ටු කළ කපටිකම් නින්දිත ලෙස වියවුල් විය. 
8 රො‍්ගීන්ගෙන් භීතිය සහ ආබාධ දුරු කිරීමට සමත් යයි කියාගත් අය ම හාස්‍යජනක භීතියකින් රො‍්ගී වූ හ. 
9 ඔවුන් බියගැන්වීමට බියකරු කිසිත් නැති වූ විට පවා වන සතුන්ගේ එහා මෙහා යාමෙන් ද සර්පයන්ගේ පිඹීමෙන් ද ඔව්හු සන්ත්‍රාසයට පත් වූ හ. 
10 වැළැක්විය නොහැකි වූ සුළඟ දෙස බැලීමට පවා අකමැති ව ඔව්හු භීතියෙන් තැතිගෙන මියගියෝ ය. 
11 දුෂ්ටකම නිසැක ව ම ඉතා බියසුලු ය. 
දුෂ්ටකම එය ම හෙළාදකින්නේ ය. 
හෘදය සාක්ෂියෙන් මඩිනු ලැබ එය නිතර ම ඉතා දරුණු වෙයි.
12 භීතිය වනාහි අන් කිසිවක් නොව බුද්ධියෙන් දෙන ආධාර තුච්ඡ කර සැලකීමකි.
13 මෙකී ආධාර කෙරෙහි ඔබේ විශ්වාසය අඩු වන විට ඔබේ දුක් විඳීමේ හේතු දැනගැනීම වඩාත් බියජනක ය.
14 එබැවින් බල විරහිත පාතාල ලෝකයෙහි ඔවුන්ට විරුද්ධ ව ඔවුන් පිට ම පැමිණි 
15 ඒ මුළු රාත්‍රිය තුළ ම ඔව්හු එක් වරක් බියකරු අවතාරවලින් හොල්මන් කරනු ලැබ, තවත් වරක් ඔවුන්ගේ ම ආත්මයේ ශක්තියෙන් තොර වීම නිසා බෙලහීන ව ද, ඔව්හු එක ම නින්දකට වැටුණා හ. 
මන්ද, හදිසියෙන් බලාපොරොත්තු නොවූ භීතියකින් ඔව්හු තැතිගත්හ. 
16 මෙලෙස එහි සිටි හැම දෙනෙක් ම හරස් පොලු රහිත මේ සිර ගෙදර සිටිවන සිටගෙන සිටියෝ ය.
17 ගොවියෙක් වේවා, එඬේරෙක් වේවා, තමන්ගේ ම රැකියාවේ නියුතු කෙනෙක් වේවා, සියල්ලෝ ම ඒ නොවැළැක්විය හැකි ඉරණමට ලක් වී දුක් වින්දෝ ය. 
මන්ද, සියල්ලෝ ම අන්ධකාරය නමැති, එක ම දාමයෙන් බඳිනු ලැබ සිටියහ. 
18 හමන මඳ පවනේ සිහින් හඬ ද අතුපතරේ මිහිරි ගී ගැයූ පක්ෂී නාදය ද වේගයෙන් ගලන දිය පාරේ ශබ්දය ද පර්වත ඇද වැටීමේ කටුක හඬ ද 
19 පැන පැන යන සතුන්ගේ නොපෙනෙන සුලු වේගවත් පිම්ම ද වනචාරි වන සතුන්ගේ ගෙරවුම් හඬ ද කඳු බෑවුම්වලට වැදී හඬ නැඟෙන දෝංකාරය ද යන මේ සියල්ල ඔවුන් භීතියෙන් අඩපණ කෙළේ ය.
20 දීප්තිමත් ආලෝකයෙන් බැබළි බැබළී තිබුණු මුළු ලොව ම කිසිත් අවහිරයක් නැති ව ක්‍රියාත්මක විය. 
21 මිසර වාසීන් මත පමණක් ඔවුන් ගිලගන්ට සූදානම් වූ අන්ධකාරයේ ස්වරූපය වැනි තිත්ත කළුවරක් පැතිරී තිබිණි. 
එහෙත්, ඒ කළුවරටත් වඩා ඔවුන් තමන්ට ම බරක් වීම භයානක විය.

 

– 18 වන පරිච්ඡේදය –

ඉශ්රායෙල්වරුන්ට ආලෝකය

1 එහෙත්, ඔබේ තෝරාගත් ජනතාවට සියල්ල ආලෝකය විය. 
එකිනෙකාගේ හැඩහුරුකම ඔවුන්ට නොපෙනුණ නමුත්, එකිනෙකාගේ කට හඬ කන වැකුණු මිසර වාසීහු ඉශ්රායෙල්වරුන් දුක් නොවින්ද බැවින් ඔව්හු වාසනාවන්තයෝ ය යි කී හ. 
2 මිසර වාසීන් ඉශ්රායෙල්වරුන්ට පෙර කළ වරද ගැන ඉශ්රායෙල්වරුන් ඔවුන්ට හිංසා නොකළ බැවින්, මිසර වාසීහු ඔවුන්ට තුති කොට, ඔවුන්ගේ යටගිය ක්‍රෝධයට සමාව ඉල්ලූ හ. 
3 සමිඳුනි, අන්ධකාරය වෙනුවට ඔබ තමන් සෙනඟට නොදත් ගමන් මඟ පෙන්වීමට ගිනි ටැඹක්, එනම්, ඔවුන් නොදැන සිටියා වූ චාරිකාව සඳහා මුදු මොළොක් ළහිරු මඬලක් දුන් සේක. 
4 ආලෝකයෙන් ඉවත් කරනු ලැබ අන්ධකාරයේ සිරගත කිරීම ඔවුන්ට කළ යුතු දේ ම විය. 
මන්ද, ලෝකයට ව්‍යවස්ථාවේ නොනැසෙන ආලෝකය දීමට නියම ව තිබූ ජනතාව ඔවුන් විසින් සිරගත කරනු ලැබූ හෙයිනි.

විනාශකයා

5 ගෙදරින් පිටතට ගෙනෙනු ලැබූ එක ම දරුවෙක් පමණක් ගැළවුණේ ය. 
සැදැහැ ජනතාවගේ ඉතිරි සිඟිති දරුවන් මරාදැමීමට මිසර වාසීන් විසින් තීරණය ගෙන තිබුණු හෙයින් ඔබ දස දහසක් පමණ ඔවුන්ගේ දරුදැරියන් මරාදැමූ සේක. තවද, ඔබ ඔවුන් සියල්ලන් චණ්ඩ සමුද්‍රයේ විනාශයට පත් කළ සේක. 
6 අපේ පියවරුන්ට ඒ රාත්‍රිය ගැන කල්තියා දන්වන ලදී. 
එබැවින් තමන් විශ්වාස කළ පොරොන්දුවල ආකාරය දුටු විට ප්‍රීතියෙන් ධෛර්යය ලබාගත්තෝ ය. 
7 ඔබේ ජනතාවගේ බලාපොරොත්තුව වූයේ දැහැමියන්ගේ ගැළවීමත් සතුරන්ගේ විනාශයත් ය. 
8 ඔබ අපේ සතුරන්ට දඬුවම් දීමට ගත් ක්‍රියා මාර්ගයෙන් ම අප ඔබ වෙත කැඳවාගැනීමෙන් ඔබ අප මහිමාන්විත කළ සේක. 
9 දැහැමි අයගේ බැතිමත් දරුවෝ රහසින් යාග පඬුරු ඔප්පු කළහ. 
එබැවින් මේ දිව්‍යමය ගිවිසුමට ඔව්හු ඒකමතික ව එකඟ වූ හ. 
ඒ ගිවිසුම නම්, දැහැමියන් එක ලෙස ම ආසිරියටත්, අනතුරටත් පංගුකාරයන් විය යුතු බව ය. 
ඒ විගස ම ඔව්හු පියවරුන්ගේ ගීතිකා ගායනා කරන්ට පටන්ගත්හ. 
10 සතුරන්ගේ අමිහිරි හඬ ශබ්දය රැව් පිළිරැව් දෙන්නට විය. 
ඔවුන්ගේ දරුවන්ට වූ විපත ගැන වැලපෙන්නන්ගේ ළයාන්විත කටහඬින් ඒකනින්නාද විය. 
11 වහලා මෙන් ම ස්වාමියා ද එක සමාන දඬුවමට පාත්‍ර විය. 
පොදු ජනයා මෙන් ම රජ ද එක සේ ම අලාභ හානි වින්දේ ය. 
12 එක විධියේ මරණයට පත් වූ මියගියවුන්ගේ විශාල ගණනක් සියලු දෙනා අතර ම සිදු විය. 
ඔවුන් වළලාදැමීමට සෑහෙන ගණනක් පණපිටින් නොසිටියහ. 
මන්ද, එක මොහොතකින් ඔවුන්ගේ ජාතියේ උතුම් ම කොටස වැනසී ගොස් තිබිණි. 
13 ඔවුන්ගේ අණවිණ පිළිගත් අය පවා කලින් සම්පූර්ණයෙන් ඒවා විශ්වාස නොකළහ. 
එහෙත්, දැන් කුලුඳුලන්ගේ විනාශයෙන් පසු ඉශ්රායෙල් ජනතාව දේවදරුවන් බව පිළිගත්හ. 
14 සව් සත නිහඬ ව සාමයෙන් සිටිද්දී රාත්‍රියෙන් අඩක් විගස ගෙවී ගොස් තිබෙද්දී 
15 සගලොවින් රාජ සිහසුණෙන් සව් බලැති ඔබේ වචනය තුමූ බැස වදාළ සේක. 
ඒ ධීර වීර සෙබළාණෝ විනාශයට නියම වූ දේශය මැදට වැඩිය සේක. 
එතුමාණෝ මුවහත් කඩුවක් මෙන් ඔබේ පැහැදිලි ආඥාව ක්‍රියාවේ යොදවමින් 
16 වැඩ සිටිය සේක. මුළු විශ්වය මරණයෙන් පුරවා ලූ සේක. 
අහස ස්පර්ශ කළ නමුත් එතුමාණෝ මිහි මත ගමන් කළ සේක. 
17 ඒ විගස ම ස්වප්නයන්ගෙන් සහ බිහිසුණු දර්ශනවලින් ඔව්හු තැතිගත්තෝ ය. 
හදිසි භීතියකට ඔව්හු පත් වූ හ. 
18 සමහරෙක් එක තැනකට ද, තවත් සමහරෙක් තව තැනකට ද විසි කරනු ලැබූ හ. 
අඩක් මියගොස් සිටි ඔව්හු ද තමන් මියයෑමට හේතුව ප්‍රකාශ කළහ. 
19 ඔවුන් පහර ලැබීමට හේතුව දැන ඔවුන් මියයන පිණිස කල්තියා ඔවුන්ට කරදර දුන් ස්වප්න මඟින් ඔවුන් අනතුරු ඇඟවීමක් ලබා තිබිණි. 
20 එහෙත්, දැහැමියෝ පවා මරුමුවට පත් වූ හ. 
පාළුකරයේ දී විශාල ගණනක් පහර ලැබූ හ. 
21 එහෙත්, නිදොස් කෙනෙකු ඔවුන් උදෙසා ඉදිරිපත් වූ බැවින් ඒ උදහස වැඩි කල් පැවතුණේ නැත. 
ඔහුගේ පූජක නිලයේ උපකරණය වන යාච්ඤාවේ ඔහු යෙදෙමින්, වන්දි ගෙවීමේ සුවඳ දුම් ඔප්පු කරමින්, ඔහු දේව උදහසට විරුද්ධ ව සිටගෙන ඒ මහත් ආපදාව අවසාන කෙළේ ය. 
මෙලෙස ඔහු සැබැවින් ම ඔබේ සේවකයා බව පෙන්නුම් කෙළේ ය. 
22 ඔහු ඒ දරුණු උදහස පරාජය කෙළේ ශරීර ශක්තියෙන් නොව, යුද්ධායුධ බලයෙන් නොව, වචනයේ බලයෙන් ය. 
මෙලෙස ඔහු පියවරුන්ට දෙන ලද දිවුරුම් සහ ගිවිසුම් සිහිපත් කරවමින් ඔහු ඒ දඬුවම් දෙන තැනැත්තා පරාජය කෙළේ ය. 
23 ඔහු මැදහත් වී උදහස නවත්වා ජීවතුන් පිට එය වැටීම වළක්වන විට මළකඳන් ගොඩගසා තිබිණි. 
24 මන්ද, නායක පූජකවරයාගේ සළුව මත මුළු ලෝකය ම සිත්තම් කොට තිබිණි. 
මැණික් ගල් පේළි හතර උඩ පියවරුන්ගේ තේජස් නාමයන් කොටා තිබිණි. 
ඔහුගේ හිස පිට වූ කිරුළෙහි ඔබේ තේජාන්විත නාමය සඳහන් කොට තිබිණි. 
25 මේවාට බිය වූ බැවින් විනාශදායකයා මේවා දැක පසු බැස්සේ ය. 
උදහසේ අල්ප මාත්‍රයක් පමණකින් ඔහු සෑහීමට පත් විය.

 

– 19 වන පරිච්ඡේදය –

රතු මුහුද මහා මාවතක් වීම

1 අභක්තිකයෝ අන්තීමය දක්වා දයා විරහිත කෝපය මඟින් පහර ලැබූ හ. 
මන්ද, ඔවුන් කරන්නට යන දේ දෙවිඳාණෝ කල්තියා දැන සිටි සේක. 
2 එතුමන්ගේ සෙනඟට යන්නට අවසර දී ඔවුන් කඩිනම් කළ පසු, මිසර වාසීන් ඔවුන්ගේ සිත් වෙනස් කොට ඉශ්රායෙල් ජනයා ලුහුබැඳ යන බව එතුමාණෝ දැන සිටි සේක. 
3 ඔවුන්ගේ අවමංගල්‍ය සිරිත් විරිත් ඔවුන් පවත්වමින්, සොහොන් කොත් ළඟ තමන්ගේ මියගිය අය ගැන ඔවුන් වැලපෙද්දී තව අනුවණ දෙයක් කිරීමට ඔව්හු සිතට ගත්හ. 
එනම්, තමන්ගේ දේශයෙන් පිටත් ව යන ලෙස බැගෑපත් ව ඉල්ලුම් කළ ජනතාව පලායන්නන් මෙන් සළකා ඔවුන් ලුහුබැඳ යාමට පිටත්වීම යි. 
4 මෙවැනි අන්ත පරාජයකට ඔවුන් පොළඹවන ලද්දේ ඔවුන්ට ම ගැළපෙන ඉරණමක් මඟිනි. 
ඔවුන්ගේ දුක්කම්කටොලුවලට තව විශේෂ දඬුවමක් එකතු වන ලෙස ඒ ඉරණම ඔවුන්ට ඒ තාක් සිදු වූ දේ අමතක වෙන්නට සැලසී ය. 
5 එහෙත්, ඔබේ සෙනඟ පුදුම ලෙස ගමන යන විට මිසර වැසියෝ පුදුමකාර මරණයකට මුහුණ දුන් හ. 
6 එහෙත්, සියලු අනතුරින් ඔබේ ජනතාව ගළවාලනු පිණිස මුළු මැවිල්ල ම ඔබේ අණට කීකරු වී සොබා දහමේ නවතාවකින් හැඩගැසුණේ ය. 
7 කඳවුරට ඉහළින් වලාකුළක් මතු විය. 
ජලය තිබූ ස්ථානයේ වියළි ගොඩබිම හටගැනිණි. 
රතු මුහුද බාධා විරහිත මාර්ගයක් විය. 
බිහිසුණු මුහුදු ජලය පලාවන් තණ බිමක් විය. 
8 ඔබේ හස්තයෙන් ආවරණය ලැබ මුළු ජාතිය ම මේ අරුමපුදුම හාස්කම් දෙස බල බලා මුහුද මැදින් ගමන් කළො‍් ය. 
9 ජනතාව තණ බිමේ සිටින අසුන් මෙන් වූ හ. 
සමිඳුනි, ඔවුන්ගේ විමුක්තිදායකයාණන්ගේ පසස් ගී ගය ගයා ඔව්හු බැටළු පැටවුන් මෙන් පැන පැන ගියහ.

සොබා දහම වෙනස් වීම

10 ඔවුන්ගේ වහල් ජීවිත කාලයේ දී වූ සිද්ධි ඔවුන්ට මතක් විය. 
සතුන් වෙනුවට මදුරුවන් රට තුළ බෝවෙන හැටිත් මත්ස්‍යයන් වෙනුවට ගඟින් විශාල ගණනාවක් මැඬියන් පිට වූ හැටිත් ඔවුන්ට මතක් විය. 
11 ඉන්පසු පක්ෂීන් බෝවුණ පුදුමාකාරය ඔව්හු දුටහ. 
එනම්, සාගින්නෙන් පෙළී ඔවුන් රසවත් ආහාරයක් 
12 ඉල්ලූ විට ඔවුන්ට තෘප්තිය දෙනු සඳහා මුහුදින් පක්ෂීහු නික්ම ආහ.

මිසර වාසීන්ගේ බරපතල වරද

13 එහෙත්, කලින් කරන අනතුරු ඇඟවීමක් මෙන් බිහිසුණු ගිගුරුම් සහිත ව පවිටුන් පිට දඬුවම් පැමිණියේ ය. 
ඔවුන් විදේශීන් කෙරෙහි දැඩි ද්වේෂයක් පෑ නිසා ඒ අපරාධවලට දුක් විඳීම යුක්ති සහගත විය. 
14 සමහරෙකු විසින් කරන ලද්දේ නාඳුනන අය පැමිණි විට ඔවුන් සාදරයෙන් නොපිළිගැනීම යි. 
එහෙත්, මිසර වාසීන් විසින් කරන ලද්දේ අමුත්තන් සහ හිතවතුන් වහලුන් කිරීම යි. 
15 ඉහත කී නුවර වැසියන් මුල පටන් ම විදේශීන්ට වෛර කළ බැවින් නිසි කල ඔවුන්ට දඬුවම් දෙනු ලැබේ. 
16 එහෙත් මිසර වැසියන් කෙළේ එවැන්නක් නොවේ. 
ඔව්හු උත්සවාකාරයෙන් ඔබේ සෙනඟ පිළිගත්හ. 
ඔවුන්ට සමාන අයිතිවාසිකම් දුන් පසු වහල් සේවයෙන් ඔවුන්ට දුක් දුන්නො‍් ය. 
17 දැහැමියාගේ දොරකඩ දී පෙර කී අයට වූවාක් මෙන් ඔවුන්ගේ ඇස් අන්ධ විය. 
අන්ධකාරය ඔවුන් වටේට ම කට අයාගෙන සිටිද්දී සැම කෙනෙකුට ම තමාගේ දොරින් යාම සඳහා අතපතගාන්නට සිදු විය.

නික්මයාමේ දී සොබා දහම වෙනස් වීම

18 වීණාවක ධ්වනිය නිරතුරු රැකගෙන ස්වර හඬ මඟින් තාලය වෙනස් වෙන්නාක් මෙන් ලෝක මහා භූතයන්ගේ ලක්ෂණ ද වෙනස් විය. 
සිද්ධීන් ගැන පරීක්ෂා කරන විට මෙය පැහැදිලි ව පෙනේ. 
19 ගොඩබිම වසන සත්තු ජලචර සත්වයෝ වූ හ. 
පීනන සත්තු ගොඩබිමට පැමිණියාහ. 
20 ජලය තුළ ගින්නේ රශ්මිය වැඩි විය. 
යමක් නිවන ගුණය ජලයෙන් නැති විය. 
21 තවද, ගින්න ඒ මැදට පැමිණි, දුර්වල සතුන්ගේ මාංසයට කාවැදුණ නමුත්, එය නොදැවුණේ ය. 
හිම කැට පහසුවෙන් දිය වී යන නමුත්, එබඳු ස්වර්ගික ආහාරය ගින්නෙන් දිය වී නො ගියේ ය.

අවසානය

22 සමිඳුනි, සැබැවින් ම ඔබ ඔබේ සෙනඟ සැම අතින් ම ශ්‍රේෂ්ඨ කළ සේක; 
මහිමයට පත් කළ සේක. 
ඔබ වහන්සේ ඔවුන් කිසි දා අත් නොහැර, නිරතුරු සැම තැන්හි ඔවුන් හා සිටිමින් ඔවුන්ට ආධාර කළ සේක.